الي تغير و اختلف هو صدق المبادىء و الشعور
د . صالح العطوان الحيالي
قبل اكثر من من عقود من السنين كانت السبوره لوح و الطالب ذكي، هسه السبوره ذكيه و الطالب لوح. في الماضي كان بيتنا غرفه صغيره و صاله يتجمع فيها الگرايب و الجيران،و اليوم بيتنا كبير و غرف كثيره بس ما فيها غير الارض و الجدران هذا مسافر و هذا مهاجر و هذا زعلان و هذا من الدنيا زهگان.
في الماضي كان غدانا تمن و مرق و قليل من الخضره نفرش الارض و ناكل من صحن واحد و ضحكتنا يسمعها الجيران،و اليوم السفره مليانه لحوم و دواجن و صحون اشكال و الوان بس يا حسره الاماكن فاضيه بتتمنى يملأها اهل المكان.
في الماضي بالحوش سهرتنا و الكبار يحكون قصه كان ياما كان نشرب الشاي و نكرز الحب و تمر و راشي و ضحكتنا تبين منها الاسنان،و اليوم سهرتنا موبايل و نت و فضائيات صرنا بخبر كان.
في الماضي كنا نسأل عن بعض و نزور بعض و نتلاقى بالاحضان،و اليوم من العيد للعيد نتزاور غصب و القعده ع قلوبنا نيران.
سابقا لو تمرض الواحد فينا تجمعت حواليه الگرايب و الجيران،و اليوم الاخ ما يگدر يقول لاخوه الحقني تراني تعبان.
سابق كان الاخ يفدي اخوه و اخته بكل ما عنده حتى لو كان فقير،و اليوم تلگى واحد مماعنده اكل و اخوه بالعسل غرگان و مسوي نفسه زعلان لاتفه الاسباب و قطيعه و هجران لآخر الزمان ..وينكم يا اهل زمان تشوفوا القلوب و شسوت بين الاخوات و الاخوان!! لا عاد الود يجمعهم و لا عادت المحبه بقلوبهم و لا احترام الكبير منهم مثل ايام زمان.
قبل كانت عشر دنانير تكفي العائله،و هسه ملاين الدنانير ما تكفي الواحد.
قبل كانت سياره وحده في البيت تكفي البيت و الجيران،و هسه في البيت وكالة سيارات و الام المريضه يوصلها الجيران.
قبل كانت اول تعرف احوال جارك،و هسه جارك يسافر و يمرض و يروح و يرجع و انت ما تعرف عنه شيء.
قبل كان اول تلفزيون واحد في البيت و قناة وحده و فتره للاطفال و فتره للكبار،و هسه كل تلفزيون بغرفه و الف قناة.
كانت بيوتنا صغيره بس صدورنا واسعة و اليوم نسكن في السعه بصدور ما فيها سعه.
كافي تلومون الزمان و عقرب الساعه يدور نفس الشهر نفس السنه نفس الفصول الاربعه.
الي تغير و اختلف هو صدق المبادىء و الشعور
