مشيرة موسى تكتب ” زينة وخزينة “

ساعات وانا قاعدة فى اخر اليوم … احتسى النسكافيه … باحب اقلب فى السوشيال ميديا كده علشان اطمن على الرعية … وحيث انى بطلت اطبخ اصلا … بقيت اعرف ان كيلو الطماطم بقى بكذا وكيلو البطاطس بقى بكذا … تطور الآمر بعد فترة وبقيت اعرف كيلو الصدور بكام وكيلو الوراك بقى بكام … ونشتري منين احسن … لحد كده الآمر عادى … يعنى كأى مواطنة صالحة على المعاش … اسدد الضرائب من المنبع على طول … مفيش مشكلة … ايه بأااااه اللى يخللى العم ماك يبعت لى فيديوهات لأسعار الذهب ومحلات الذهب … ايه اللى خلاه يعتقد انى ممكن اهتم بالذهب … علما ان بقالى اكتر من ٣٠ سنة لا اتزين ولا اشترى الا الفضة … والفضة القديمة كمان …
ما علينا فيديوهات … الذهب … الذهب … الذهب …
دخلتنى لحاجة تانية خاااااالص … بصراحة انا منبهرة جدااااااااا جدااااااااا … لا خالص ما تتسرعوش … انا ثابتة على المبدأ … الفضة زينتى … امال ايه بأااااه … طلع لى فيديوهات لستات حلوات ” مربربات ” … مش هقول لكم على المكياج والاظافر … هما لابسين الذهب بالكيلو … ربنا يبارك لهم ويحفظهم من العين …كلهم قالوا جملة واحدة ” الذهب زينة وخزينة ” … اللى عجبنى هنا مش الذهب … لا خالص … اللى عجبنى الستات اللى لابسة الذهب … فى منهم اللى شغلتها بيع الذهب وفى منهم ” معلمات ” … اه والله … من السيدة زينب ومن بحرى ومناطق اخرى … ايه الجمال ده … تحس بالجدعنة بتاعة زمان … الستات الجدعة دى هى اللى بتجيب الحق لأصحابها … الستات دى محبوبة وكلمتها مسموعة … واكيد الجدعنة لها اصول … وطبعا زى ما الستات دى عجبتنى ونفسى اشوفهم واتعرف عليهم طلع لى كمان فيديوهات غريبة لستات مرعبة … اكيد الفرق كبييييير بين المعلمة والبلطجة … حزينة من فيديوهات تصور البلطجة والمخدرات وحرم البلطجي بذهبها وطريقة كلامها هى وهو وابنهم وصبيانه ومكان التصوير … ولا يشفع لهم فعلا الا ظهور الأخ الطيب فى اخر الفيديو… ليعدل كفة الميزان … انا كده دخلت من موضوع لموضوع … بعيدا عن الطماطم والبطاطس … والمعلمة والبلطجة … اكتشفت من الفيديوهات دى … إن احسن استثمار هو الاستثمار فى الدهب … والذهب غير المشغول (بدون مصنعية)… سبائك يعنى … لاشقق ولا شهادات … انا قلت اقول لكم … علشان تحطوا القرش على القرش … وتشتروا ذهب … لأنه على رأى المثل ” زينة وخزينة ” …