مشكلة المعلمة بين مؤيد مدافع وبين معارض بسيف القدوة

.

كتب/ اللواء. أ.ح. سامى محمد شلتوت.

• ترددت كثيراً لكى أعبر عن رأئ فى هذا الموضوع . لكنى أخط هذه الكلمات لأنني أتسق مع نفسى…. الرقص عيب وحرام متفق معكم. مع العلم أن ثقافة المجتمع المصرى حين يفرح يعبر عن ذلك بالرقص و كل أفرحنا رقص وغناء. هل الرقص متنافي مع التقاليد والعادات .الآباء والأمهات يرقصن فى أفراح أولادهم وأقاربهم. تقول المدرس قدوة وهل الأب ليس قدوة.

•أنا هنا لا أتفق أو أعترض أنا فقط أحلل وأقول ما يتوجب قوله. الشاشات بما فيها من مسلسلات وأغانى تنشر هذه الثقافة الراقصة. هل الرقص فن أم حرام. المجتمع لابد أن يكون عادلاً لا تنشر الرقص وتحرمه.لابد من أن تتساوى نظرتنا للجميع أنثى ترقص وتكرم وأنثى ترقص فتذبح.

★كلمة حق.قرأت الكثير بين جزار شاهر سيفه بدعوى القيم والقدوة وبين مدافع عن المعلمة.ولكن ألخص خلاصة القول فى السجال الدائر حول هذا الموضوع.

•لما قرأت خبر تحويل مدرسة للنيابة الإدارية و فصلها عن العمل وطلقها زوجها وأصيب أولادها بصدمة لأنها رقصت فى رحلة ترفيهية خارج المدرسة ، أفتكرت فيلم اللمبى لما قال و أنت بتعاقبهم علشان هربوا و لا علشان فشلوا…..
نفس سؤال اللمبي برضو?? . أنت بتعاقبها علشان الرقص و لا علشان مدرسةو بترقص…

• أولا معظم الشعب المصري إتربي على إحترام العادات و التقاليد و أن إحتشام الست و وقارها هو مبدأ لا يمكن التنازل عنه تحت أي ظرف.

• ولكن السؤال برضه لسه موجود . أنتوا بتعاقبوها ليه ؟؟…
علشان الرقص عيب مثلا ! جميل وليكن كذلك ما الطاهرة فيفى عبده إخترتوها أم مثالية ، و جامعة عين شمس كرمت الطاهرة إلهام شاهين…….

• برامج الشاشات كلها رقص و مياعة و خلاعة وإنحلال وقذارة .. أضافه لبعض المذيعات المتواجدات ليل نهار على الشاشات بملابس مستفزة….

• و بالنسبة للسيدات اللى كانت بترقص فى الإنتخابات جوه المدارس أحسن من رقص الصبارة الراقصة ده نقول عليه أيه مثلا… و بقت صورة مرتبطة بالإنتخابات والتى إنبرى أعضاء المجلسين الموقرين بذبح المعلمة الراقصة لكن الرقص لأجل إنجاحهم واجب وطنى ومهمة شريفة لتحفيز الناخبين.
مانتوا كنتوا بتقولوا الناس فرحانة ومزقططه ، و لا فرحانة دى مخاصمة الرحلة بتاعة المعلمة…

• وليكن مثلاً عاقبتوها علشان هيبة المعلم ،جميل ماهو ده برضو مهنة سامية وراقيه و ليها هيبتها !
ولكن يا ترى سامية و هيبتها ما إتحركوش ليه لما مدير مدرسة بيبيع فول على عجلة علشان مش لاقى يصرف على أولاده….

• ياترى سامية و هيبتها ما إتحركوش ليه لما كان مدرس بيشتغل عامل نضافة فى كافتيريا
يا ترى سامية و هيبتها ما إتحركوش ليه لما أغلب المدرسين بقوا صنايعية و عمال علشان مش لاقيين ياكلوا … لا تقل بيعطوا دروس فهم مدرسي المافيا……

• يا ترى سامية و هيبتها ما إتحركوش ليه لما مدير مدرسة و لا مدرس بينضرب و يطحن و يتهان و يتشتم بأبشع الألفاظ من ولى أمر و لا طالب بلطجى .

• ياتري ساميه وهيبتها متحركوش ليه لما معلم درجة أولى يمسك لافته بين إيديه ويعلن للملأ أنه بيبيع كليته عشان يأكل أولاده.

لما تحققوا هيبة المدرس بالفعل أبقى إعدموا المدرسة المتبرع وليست معينة ولكن بعقد مؤقت من أجل تربية ثلاث أطفال. تحولوها لنيابة لن يحل المشكلة وليس الحل العادل ، أصلحوا التعليم وأحوال المدرسة والمعلم ..
٭ مع العلم بأن ليس من بين أسرتى من يعمل بالتدريس وأولادى أنهوا تعليمهم لكنها صرخة حق…

• وفى هذا السياق أشكر وأحي السيدة رئيسة المجلس القومي للمرأة .على رسائلها لزوج وأولاد المعلمة وتوفير فرصة عمل لها فى المجلس.

★من ستر مسلماً ستره الله يوم القيامة.من نشر وفضح سوف يفضح على رؤس الأشهاد……
٭ أصلحوا منظومة التعليم كاملأ أولاً وقبل كل شئ…..
٭ حتى يتم ذلك لا تدعوا الفضيلة وأدعوا إلى الحق والعدل والأصلاح ولاتذبحوا أسرة و مثلها الكثير من الأسر تخطئ وتصيب..
٭ أثابكم الله وعفا عنا وعنكم. .