إبعدي

 إبعدى 

بقلم / أشرف عيسى 

 

هعيش
وكأنى معرفكيش
والضحكة غيرها مفيش
عنوان دموع أحزانى
هعيش
أحلم بحد يعيش
جنبى ما يجرحنيش
يعشق ولا ينسانى
إبعدى عنى لأنى مش هكون لك يوم نصيبك
إبعدى عنى لأنى عمر قلبى ما كان حبيبك
صدقينى
سامع سكوتك
حاسس بغيرتك
حتى صوتك حتى صورتك
وانشغالك بيه وحيرتك
كل شىء بيقولى إنك
لسه مش قادرة تصدقى
إنه خانك
إنه باعك
إن قلبه مكان خداعك
إنه حب فى يوم وداعك
واحدة تانيه بتبتدى
تديله كل اللى اديتيه
تعيش فى حبه تحس بيه
تملا حياته تغير عليه
وبعد فترة بتنتهى
وتيجى واحدة تعيش مكانها
يضيع أملها ويجى دورها
وزيك انت يكون مصيرها
زى شمعة بتنطفى
ابعدى ابعدى ابعدى
ابعدى عنى لأنى مش هكون لك يوم نصيبك
ابعدى عنى لأنى عمر قلبى ما كان حبيبك
هو ايه
هو ايه الحب عندك
يعنى ايه
تخدعى وأفضل أحبك
كنت سيبى القلب فاكر إن قلبك كان ضحية
وإن قلبى بحبه قادر يدى لك الروح هديه
انت ايه
نفسك بحبى ونبض قلبى ترجعيه
انت ليه
دايما دا حلم ولسه عايزة تعيشى فيه
رجعيه
وارجعى له إن كنت قادرة إنك انت ترجعيه
وانسى قلبى
ما انت قادرة تخدعينى عشان عنيه
ابعدى عنى لأنى مش هكون لك يوم نصيبك
ابعدى عنى لأنى عمر قلبى ما كان حبيبك
وأعيش
وكأنى معرفكيش
والضحكة غيرها مفيش
عنوان دموع احزانى
وأعيش
أحلم بحد يعيش
جنبى ما يجرحنيش
يعشق ولا ينسانى