أدب

أنا هاكتب وهاكتب

أنا هاكتب وهاكتب

بقلم / أيمن بحر

 

هاكتب كلمة
هاكتب فكرة
هانده كل حروف النور
وارصصها فوق الفكرة
وألضم فيها سطر طويل
متعلق فيه القناديل
سطر بطول السما والأرض
مش هاتوقف أبدا يوم
هافضل اكتب واملا الكون
هايخطي كلامي العراقيل
والأقاويل …والفكر المتغطي بسرابيل
جوه العتمه هاكتب برضه
هاكتب بالحبر الناهض
لونه مسكر مابيبهتش
مابيسكتش
حبر تشمه تقوم شبعان
وتعافر مع كل الصعب
هاكتب لوحة
منقوشه برسم الأجداد
فيها موكب جاي بالنصر
هاكتب وصفة مااتوصفتش
وصفة فيها الرؤية رسالة
ماشية بقوة مش متشالة
ولا عاجزة تدافع عن روحها
ولا يقدر كائن يجرحها
هانسج من كلماتي قماش
كل ثواني فيه ينعاش
مهما يلف الوقت يعيش
مش من غش ولا من غشاش
هاكتب كل تاريخ فى بلادي
مين كان قائد
مين كان عادي
مين من دمه
داب فى دماها
هاكتب نبض الناس الغالية
وأوصف فيهم ثانية بثانية
حتي الناس العره
هاكتب عنهم مليون قصه
توصف .. كدب .. وزيف .. وخداع
هاكتب كل حاجه 
بس المهم اللي يقرأ

مقالات ذات صلة

شاهد أيضاً
إغلاق
زر الذهاب إلى الأعلى