الحب قسمة

ليه حبيبتي تقولي كانت
حاجة حلوة وفجأة هانت
إنتي بس اللي ف زماني
أحلي غنوة ووردة زانت
إنتي فجر في ليل طويل
زي نسمة ف صيف عليل
إنتي صدفة ف ألف جيل
قلب عاش في المستحيل
ليه تقولي خلاص نفارق
قلبي عاشقك مش مفارق
مش بيجرح مش بيقسى
ليه حكمتي بدون بيارق
مش راح أحلف أو أدور
دانتي من حور البحور
لو هتبني ف ألف سـور
هكسره لو فيه صخور
أما عن شوقك وشوقي
صحصحي فورا وفوقي
دا إنتي نبضة في عروقي
دا النعيم بينادي روقي
إنتي تنسي قوام كلامك
أصل قلبي ملاه غرامك
يبقى ليه تبدى حسامك
تظلمي وتبدي ف ملامك
ده إنتي حلم العمر كله
نور ملك عايش ف ضله
نعمة من ربي وأقول له
دي الحبيبة لعمري كله
قلبي شايفك أغلى نعمة
كل حاجة فيكي طعمة
يوم ما شفتك شفت نجمة
قلت يومها الحب قسمة
بس ليه ظنك دا قاسي
ليه حكمتي بإني ناسي
ليه تقيدي النار ف راسي
دانتي لمشاعري المراسي
طب هقولك حاجة تانية
امسحي كلامك ف ثانية
وابقي قولي إن إنتي دنيا
لو تغيب راح أموت ف ثانية
بقلم أحمد سلاطين
قد تكون صورة بالأبيض والأسود لـ ‏شخص واحد‏