بين الماضي الجميل والحاضر السيء

د.صالح العطوان الحيالي

عندما نتكلم عن الماضي قسم من أصحاب الوجهين يمتعض لأنه أثرى بطرق شتى بعيدة كل البعد عن الحلال اليوم سأتكلم لكم عن حالة واحدة وهي صرفيات العائلة العراقية وانا دائما اميل بكتاباتي إلى الريف لاني ابن الريف وعشت وترعرت في الريف حياتي الحلوة الجميلة..وكلماتي ممزوجة بين اللهجة العامية وبين اللغوية

مصـــــــرف البيت بين الماضي والحاضر ..

_ قبل .. تعبية السيارة بالف ونص ، .. طبعا اذا كنت تمتلك سيارة وهذه حالة نادرة . وحاليا تعبية السيارة ٢٥ لتر ب٢٥ ألف دينار

– قبل .. قسيمة التلفون الارضي كل سنتيـــــــن تلاثة تصلك بدينـار وكم فلس ، هسه كل يومين ثلاثة لازم تعبي رصيد ( وهاي إذا الواحـد عاقل وماعنده قارش وارش ) ..

– قبل .. إذا الله يوفقك تبدل التلفون الارضي ابو القرص بتلفون لمــس سعره ب ١١ دينار ، هسه كل سنة لازم تبدل موبايلك ، والجهاز مايقل عن ١٥٠ دولار ..

– قبل .. إشتراك الحزب ربع دينار ، هسه كل إسبوع يخابــرك واحد من العشيرة ويگلك تره فلان ذبـــــــح فلان ، لو فلان دعم علان وعلـــــيك كذا الف دينار !

– قبل .. اولادك يروحون مشــــي لمدارسهم ، هسه لازم خطوط نقل من وره العلاســــة ..

– قبل .. القرية كلها لو عندهم سيارة لو لا . هســــه كل بيت بيه سيارتين وثلاثة ..

– قبل .. ماكو شي إسمه مـــــــدرس خصوصي ، هســه مــدرس ومعـلم وحضانـة خصوصي ..

– قبل طفلك ترهم وياه حضينه وزروره مثل الورد ، هسـه إذا مو بامبرز السلهاف والطفح يصلخ جلده ..

– قبل .. الناس تستخدم بخور .. هســــه إلا معطـــــــر جو اوتوماتيك ، وشمعة عطر ، ومعطر ارضيات ، وديتول ، وفلاش ، وعمــلاق , ولميس , وكونفورت ، ..

– قبل .. المدارس تعطي قرطاسيـــــة وكتب ، هسه تشتريهه من السوگ وإنت الممنون ، وبعد وياهه ملازم ومرشحات واسئلة وزارية ..

– قبل .. هوا المبردة رحمة من الله، هسه أربع سبالت وكنتوري ..

– قبل .. مي الحنفية زلال ، هسه اذا مو مي آرو يصير بينه ملاريا !!

– قبل .. عراقك كله بيه ٣ كليـــــات أهلية وابنك توديه معهد وينتهي الموضوع ، هسه يجيب معدل ٥٠ ولازم توديه قانون اهلي ..

– قبل .. قسيمة الكهرباء فلسين ، هسه تعطــــي ١٥٠ الف خط ذهبي من وره الكهرباء الوطنية ..

– قبل .. المسعدات يخبزن ويطبخن وكلشي يسون ، هسه الا ديلفري !

– قبل .. النسوان قانعات بشكولهن ، هسه اذا ماتحــور خشمهه وشفتهه و بعض تضاريسهه تصير بيهه حاله نفسية ..

– قبل .. العينتين تكولك فدوه طلعنه للزوراء ، هسه گــامن مايحچن إلا بـ أنطاليا ، واذا ماعندك تگلك ودينه لاربيل وامرنه لالله !

– قبل .. سيارة كرونه موديل ٨٠ بسنة الالفين وثنين يسموهـــه بلاديه ، هسه الفايخ ٢٠١٨ يسميهه جوه الموديل !!

– قبل .. تضربلك تمرايتين زهــــــدي تصير وحش ، هســـه شيشة عسل أصلي بـ ٧٠ وحلويات الخاصكــي وأبو عفيف ونريد بس إنجيب الراس عالراس مايرهم !! ..

ها ما نحجي على المخضر واللحم والسمك واللوبيا الووو….