قولي عني بقلم/ عاطف كبارة

قولي عني

بقلم/ عاطف كبارة

قولي عني كنت ماضي
ونسيتيني
قولي إني مت . عادي
وادفنيني
وارسمي صرح المحاكمة
كوني فيه جلاد وقاضي
خلي حكمك يبقى منفى
سيبي كرسي دفاعي فاضي
واعزليني
باوعدك لحظة فراقنا
حتلاقيني
من بعيد ساكت وراضي
قولي عني كنت ماضي
ونسيتيني ..

غصب عني وكنت قاصد
أنسحب من قبل طردي
كنت شايف ألف واحد
كلهم يتمنوا ترضي
كل مرة بتحكي عنهم
سهم يسكن بين ضلوعي
كنت سور بينك وبينهم
واختياري كان خضوعي
رضيت إني أكون مظلوم
وابان ظالم
واخبي كسرتي من اللوم
وبتآالم
بقيت كلمة ف حكاية أمس
وإسم قديم
غيوم إسود مداري الشمس
وجرح أليم
نسيتي .. إن ياما الحبس
فيه مظاليم
ليه ماقدرتيش المرة دي
تفهميني
قولي عني كنت ماضي
ونسيتيني ..

إنتي أجمل كل حاجة
حلوة قابلتني ف حياتي
وانا كنت باتمنى بسذاجة
تفضلي معايا لمماتي
كنتي نور من بعد توهتي
وسط صحرا وعتمة ليل
فجر يكشف سور مدينتي
بشرة الخير والدليل
مافضلش ليا غير عتابك
وانكساري
ما قدرتش أتحمل عذابك
بانتظاري
العتاب ف عنيكي قاتل
سهمه جارح
واتهامك ليا باطل
ظلم دابح
مش حدافع أو أماطل
قلبي سامح
سني سكينك ف إيدي
وإدبحيني
قولي عني كنت ماضي
ونسيتيني ..

لسة قلبي بيفتكر
كل اللي كان
من يوم لقاكي
لسة بيروح كل يوم
نفس المكان
يقعد معاكي
لسة بيكدبني لما
باقول نسيتك
حلمه رافض ينتهي
مكدب قسيتك
بس عارف إنه
مش حيكون نصيبك
وحتسيبيني
قولي عني كنت ماضي
ونسيتيني ..

روحي عيشي لدنيتك
وافرحي بأيام شبابك
واسكني قصرك أميره
الأمير حيدق بابك
نفسي قلبك عمره يوم
مايشوف آلآمي
بادعي ربي تنسي إسمي
من الأسامي
ولو يصادف مرة تقري
حروف كلامي
كدبيني
وقولي عني كنت ماضي
ونسيتيني
قولي إني مت . عادي
وإدفنيني …