أدب
ياالليل
ياااليل
مصطفى عبد النبي
يااااليل يابو السهارى الحيرانين
قولي منين ضي القمر يبزغ حنين
ومنين يجي اللقا للعطاشى المشتاقين
ولا منين يبقى زرع الحصاد أمل لليائسين
الواد راكب دماغه مش ناوي
يرسم الضحكة على وش الحزين
ولا ناوي خير للغلابة الشقيانين
علشان عتريس رافع سلاحه
اللي اشتراه بدم الفلاحين
وكل رشدى راكب حصانه الخشب
وعامل فارس !!! ماهو عصر الخيبانين
وفؤاده واقفة بتلملم حبات الخير
وتنادي!!!! ياخلق مين
مين عصى الولد وياعيني عالولد
تاه منه الطريق والصحبه الطيبين
عاشق فؤاده من وقت قلبه
ماكان شايل الخير وزين
اصحى ياعم ..العشق باطل..
والخير ميتكيلش بمكيالين
اوزن امورك وارجع لطينك
لحسن الكيل طفح كيلين
رجع فؤاده لاهلها
واطلق سراح حلمها
اللي استعصى طول السنين
ده الخير كتير والحصاد وفير
لولادها الطيبين….
