مشيرة موسى تكتب : ” اهلا بالأعياد “
وادى الربيع عاد من تانى … كل عام وأنتم بألف خير … ومش جاى لوحده … لا جايب معاه كمان ” عيد الأم “… كل لحظة وكل ست حنينة وطيبة واصيلة وكريمة فى احسن حال … كل لحظة وكل ست قادرة على العطاء غير المشروط … بأحب اليوم ده جدااااااااا … من زمان … واحنا صغيرين كنا بنعمل كروت لأمي والمدرسين نرسمها ونكتبها ونملاها ورد وقلوب … وقبل كل ده … نملاها حب … كنا انا واخواتي بنطلب من ابويا فلوس علشان نجيب هدية عيد الأم … هو فى قرارة نفسه … كان بيبقى مبسوط … لكن كان دايما يقول ” انا مالى هى امى ولا أمكم انتم ؟” … بس الحقيقة الكلام ده كان من ورا قلبه …دايما كان بيدينا فلوس وفلوس كتيييييير كمان … ما الهدية كانت لحبيبته وأم اولاده … هدية عيد الأم زى هدية عيد الميلاد … لازم تكون شخصية … مش طقم حلل وكوبايات … الحقيقة هدايا عيد الأم اليومين دول اختلفت عن ايامنا شويتين … سمعت عن بنات واخذين امهم يعملوا جلسات مساج … وتاتو للحواجب … واشتراك للجيم … وكمان سفريات مع الصديقات … ربنا يسعد الجميع … بس انا افضل لمة العيلة … اللى بقت حاجة نادرة اليومين دول …
قد ما كترت اغانى الإحتفال بالأم … الا انى مش بافتكر الا اغنية الست فايزة احمد … الكلام والمزيكا وصوتها لازم نصدقها لما تقول ” ست الحبايب يا حبيبة ” … يمكن يكون فى حاجة جديدة كويسة … لكن معظم الأغانى اللى سمعتها باحسها نية وناقصه شوية … لسه محتفظة بالكروت والجوابات اللى اولادى كانوا بيكتبوها ويرسموها وهما صغيرين … كلها وعود بالحب وسماع الكلام والمذاكرة.
الربيع عندنافى مصر حاجة تانية … يعنى كنت فى اوزبكستان من كام شهر … الجناين فى الشوارع كلها عبارة عن سجادة مالهاش اخر من زهور البانسيه باللون الأصفر والبنفسجي … وفى أوربا الزرع والشجر بيتكسى بدرجات من اللون الأخضر البديع … اما عندنا فعلى عكس اغنية سعاد حسنى ” الدنيا ربيع والجو بديع”… الربيع بييجي معاه رياح الخماسين … وقلبى مع الحبايب اللى بيعانوا من الحساسية والجيوب الأنفية … لكن اكيد فصل الربيع له ميزات أخرى واكيد هو مقدمة لفصل الصيف اللى كتيييييير من الناس بتفضله علشان الإجازات والبحر … انا الحقيقة بأحب الشتاء …
قاعدة باسمع الراديو … لسه اغانى واحتفالات نصر اكتوبر ( العاشر من رمضان ) … حلوة الفرحة … ربنا يفرح قلوبنا ويجعل كل ايامنا أعياد وأفراح … كل لحظة وكل المصريين طيبين … كل لحظة وكل ام مصرية طيبة … كل لحظة وكل شبابنا ناجح ومحقق حلمه …
