إبـرة وخـيـط

 إبـرة وخـيـط 

يسرا صقر

بإبرة وخيط
راح أغزل توبى بالألوان
من الإسود أنا مليت

بإبرة وخيط
هداوي جراحي هي كمان
وألملمها
راح أرجع … ذي ماتمنيت
بإبره وخيط
وبالغـُرزة
راح أرسم شمس
تنورلى ذى ما أنا عايزة
وأعلقها هنا ع الحيط

ببكرة وخيط
وكام ورقة
راح أتسحب … كده سرقة
لسطح البيت

ألف البكرة بدُبارة
ف تجرى ورايا طيارة
وأطير وياها
وأتنطط كده تنطيط

بإبرة وخيط
راح أعمل عـُقد
وألضم كل أحلامى
وأحققها ف مرة … بجـد
كفاية عنها إتخليت

بإبرة وخيط
راح أرسم لوحة بالكنڤا كده بروقان
لقلب أبيض لسه زى زمان
وماإتغيرش…
مهما عدت الحواديت
وأعلقها هنا ف قلبى
بإبرة وخيط