القصاب والحلاق

د. صالح العطوان الحيالي

كثير من الناس في اي مجتمع من المجتمعات وخاصة مجتمعنا تمشي بجنب الحيطة تريد الوضع يمشي أو يبقى على حاله لان هي عايشة ومرتاحة براس الآخرين تأكل وتوصوص حالها حال اخونا الكصاب وصاحبنا الحلاق التي ساسرد لكم قصتهم ..

فد يوم من الأيام الكصاب جاي يكطع باللحم. وضرب العظمة بالساطور وجان تطفر شكفه عظم بعينه. صارت عينه حمرة وكام توجعه . راح للحلاق لأن ما جان اكو دكاترة ومستشفيات. فحصه الحلاق وكله بسيطة يرادلهه تعقيم وشوية دهن. وضمده وكله يومية مرلي انظفه الك. ثاني يوم الكصاب أخذ وياه كيلو لحم وكيلو معلاك للحلاق. والحلاق ماقصر هم تنظيف ودهن وما حرك العظمة ابد استمر الوضع أيام والحلاق يضرب لحم ومعلاك. وفد مرة أجو ناس عدهم طهور وبعيدين عن الولاية. وقبل الحلاق هو الي يطهر الجهال. فوصى ابنه يبقى بمكانه بالدكان على ما يخلص الطهور. أخذ عدته وتوكل. الولد كاعد بمكان ابوة وجان يجي الكصاب للدكان وسأل عن الحلاق. كله الوالد عنده طهور ويتاخر. أمرني شعندك. كله الكصاب أبوك معلمك على الصنعة. كالة الولد بلي. شاف الولد عين الكصاب وكله بسيطة. هاي شكفه عظم بازة عينك وهسة أسحبه. وفعلا سحبه ونظف العين. بالليل رجع الحلاق لبيته وسأل أبنه عن الدكان منو اجة منو راح.كله الولد اجه بس الكصاب وطلعت العظمة من عينه. الاب جاوبه( من دبش بعد نأكل لحم ومعلاك ).اكو ناس تريد الوضع يبقى مخربط حتى تأكل لحم ومعلاك. …