تليكتابة… عزله . سكيلز . نولدج

بقلم / اسامه بدر

أخباركم أيه يارب تكونوا بخير . أكيد أنتم مستغربين العنوان وكمان بتسألوا أيه وجه الصله بين الثلاث كلمات .

تعالوا النهارده نتكلم عن حاجه إحنا ممكن نكون مش شايفنها أو مش أخذين بالنا منها وزي ما أتعودت بحب كلامي يكون معاكم عبارة عن فضفضة وبحب الكلام يكون سلس وبسيط .

تعالوا نشوف أيه اللي بيربط الثلاث كلمات ببعضهم

موضوع النهارده خليط غريب شوية ولكنه مفيد وقد يكون مفيد للبعض والبعض الأخر لا يفيد ولكن شوفوا السطور مكتوب عليها أيه وقرروا الموضوع حلو ولا لاء .

بص يا عم أنت وهي هنأخذ مع بعض رحلة صغيرة في تفصيص الثلاث كلمات يالا بينا نبدأ .

العزله .

لما لاعب كرة قدم يكبر فى السن نلاقى الأخبار كلها عن إعتزال اللاعب فلان لعب كرة القدم ، هو مش هيبطل يلعب كرة القدم ونشوفه ونستمتع بلعبه ومهارته ولكن هيبطل يشارك مع فريقه ويظهر على شاشات التلفزيون ولكنه أيضا سوف يمارس عمل أخر فى نفس تخصصه زي مثلا أنه يكون مدرب أو مسؤل إداري .

نفس الموضوع للموظف لما يبلغ سن التقاعد فهو إعتزل العمل الإلزامي ولكن قد يشارك بخبراته المكتسبة من خلال عمله فى الأعمال الخيرية أو التطوعية .

لكن العزلة المجبر عليها الإنسان وخاصة فى سن صغير هى الأخطر والخطورة هنا إن الطفل اللي دخل فى مرحلة العزلة وهو مجبر قد يستطيع فعل أشياء يكاد قلبك أن يقف من الخضة أو الصدمة عارفين عزلة الطفل وخاصة لما يكون لوحده مثلا فى البيت ممكن توقف قلوبنا ازاى . تعالوا نشوف

طفل لوحده في البيت وقاعد على الشباك على إرتفاع خمسة عشر أدوار من العمارة المقيم فيها وانت كوالده أو أنتى كأمه تشوفوا المنظر ده من تحت المبني يعني من الشارع هيبقي أيه شعورك ، انت اول حاجه بتتخيلها لو الطفل ده وقع ودي لحظه كفيلة إنها توقف قلبك تخيل لو طلعت الأدوار الخمسة عشر على قدميك في محاولة لإنقاذ طفلك وأنت كنت السبب أنه يقع وتفقده. متخيل طيب لو طلعت البيت ولاقيته قاعد زي ما هو وندهت عليه بهدوء ورد عليك ونزل واقع على الأرض ميت اكيد ممكن تنزل وراه من نفس الشباك .

قلبكم وقف من اللي قولته ده صح . طيب تعالوا نتخيل أنه لسه موجود على الشباك وقاعد ومبسوط وانت بهدوء ندهت عليه ونزل من الشباك ودخل البيت عادي وواقف يكلمك عادى خالص أوعوا تفكروا تضربوا الطفل لكن لازم تحافظ على هدوئك وتفهمه أن اللي عمله ده غلط يا أخي أنت قلبك كان هيوقف من شوية تخيلات قولناها مع بعض .

سكيلز .

دي كلمة آنجليزيه ومعناها مهارات أنتوا ملاحظين طبعا أني بوصف كلمة آنجليزية والمقال باللغة العربية صحيح أنا متعمد أتكلم بمقال كلماته ممزوجه بين العربية الفصحى وبين العامية ومتعمد كمان أضيف كلمات إنجليزية ، تعالوا نشوف ليه .

زي ما قولت من شوية سكيلز تعني مهارات والمهارات نوعين أما مولدين بيها زي أنواع الفنون مثلا الغناء ، الرسم ، والعزف على الألات الموسيقية أو الإيقاعية .

أو مهارات مكتسبة زي العلاقات العامة والاجتماعية والمهارات المكتسبة من الواجبات والعادات والتقاليد .

يا عم أستني هقولك أنت مستعجل ليه _ معلش حد بيسأل أيه دخل ده بالموضوع .

بص يا سيدي فاكر طفلك اللي عزل نفسه وقلبك كان هيوقف لما شوفته ممكن يموت وانت بتتفرج عليه ومش عارف تعمل أيه .

طفلك ده انت مش بتتكلم معاه ولا أمه حتي والمصيبة الكبيرة أن مفيش حد فى العيلة من سن طفلك وخوفك عليه مخليك حابسه ومش عايزه يختلط بالناس وعلشان أنت وأمه مش معاه فبالتالي أنت متعرفش هوايته ولا حتي ميوله أنت حتى ملاحظتش أنه معظم الوقت ساكت مثلا بتتكلم معاه شويه وتسيبه ولما بيسألك على حاجة ردك بيكون بسيط مش بترد عليه بعمق وانت متعرفش أنه بسنه الصغير عنده مهارة زي مهارة الإستماع الجيد للمتحدث معه حتي وإن كان تليفونه المحمول متخيل أنك تارك تليفون لطفل عنده ثلاث سنوات وأنك علشان تريح دماغك منه عرفته يتعامل مع التليفون المحمول ازاي وسيبته ولكن اللي انت متعرفهوش أنه فى سنه الصغير ده أكتسب مهارات أنت ممكن تكون لسه بتتعلمها زي البحث عن فيدوهات أو العاب أو لقاءات تلفزيونية تتناول موضوعات مهمة قد تكون تسبق سنه وقد يهتم بما يحبه مثل الفنون أو الرياضة وده يخلينا نروح للكلمة الثالثة وهي .

نولدج
دي بقي يا سيدي معناها المعرفه وبما أن طفلك ممكن يكون أكتسب شوية مهارات يبقي أكيد كمان أكتسب شوية معرفة يعني معلومات يعني مخه أتغذي بمعلومات من التليفون المحمول اللي انت وأمه كنتم في قمة البخل معاه فى آنكم تعرفوه المعلومات دي فبالتالي متستغربش لما تلاقيه سابق سنه ويسألك سؤال يخليك تلف حول نفسك أو تضرب كف بكف .

أنتوا عارفين لو طفلكم يأخد معظم المعلومات منكم أعتقد يكون أفضل وخاصة لو بتلقي معلومات ذات أهمية تسرع من نضجه الفكري وده هيساعده أنه يتعلم حاجات كتيرة مفيده وبشكل أسرع لأنه شبعان دفيء أسرى مش إهمال من الوالدين .

أعتقد أن فى ربط بين الثلاث كلمات بعد كل الكلام اللي فات ده لكن عايزكم تعرفوا شوية حاجات

الطفل اللي كان قاعد علي الشباب وقدميه خارج الشباك كان فى جلسة تأمل وهو يغني أو يدندن بموسيقى هو وحده من يعرفها وهو وحده أيضا الذي يعرف كيف يستطيع الجلوس على شباك من شقه فى دور مرتفع جدا وهو وحده الذي يعرف كيف ينزل من على هذا الشباك وده لسبب بسيط جدا وهو من خلال مشاهدة الفيديوهات أصبح لديه المهارة والمعرفة .

لكن المهم فى هذا المقال أن تعرفوا من هو هذا الطفل

من أتحدث عنه هو طفل قد لا يتحمله أهله لو إيمانهم ضعيف وقد يتحملونه وهم يتألمون ويتأذون من معانتهم معه وهم لايعلمون أن بين أيدهم كنز ، هم لايعلمون أن لديهم طفل يمتلك من المهارات والمعرفة الكثير وقد يكون لدية سرعة بديهه وقد يكون بطيء نسبيا فى رد الفعل وهذا الطفل ينقسم إلي نوعين وهذين النوعين أثبتوا جدارتهم بمجرد الإهتمام بهم هذين النوعين هما .

أبطال من ذو الهمم أو أصحاب الإعاقات سواء الذهنية أو الجسمانية ،والنوع الثاني من هذه الأطفال هم أبطال التوحد .

أعتقد كده أنتوا عرفتوا كمان علاقة الكلمات الثلاثة ببعضها