إحتضار

إحتضار
الشاعر حاج هلال

كنت نايم بالنهار
جسمي حاسس بانهيار
دق في قلبي ونار في جنبي
قلت ده يبقى احتضار

حد شافني قام كشفني
بص في وشي مش عرفني
قلبه خاف م اللي شاف
وقال في نفسه إحتضار

كان قراره واجتهاده
قال نجيب زوجته وولاده
وحده وحده قول معايه
قوم نلقنه. الشهادة

والكلام ده كله سامعه
واللي يقول أرد بعده
لا إله إلا الله محمد رسول الله
قالوا لاء مش احتضار

قوموني قالوا مالك
قلت لازم ارد كذلك
رحت ساند قمت قاعد
وقلت حاسس بانهيار

من يومين ماكلت حاجة
عيش ومية في الإزازة
والمعاش ياريت ماجاش
والغذاء واخد أجازة

والا لحمة والا فاكهة
والمريض مستني رحمة
والعدد محتاج. مدد
ناس كتير ودارنا زحمة

عندي كبت وعندي ضيق
ولا حد بيقول صديق
كلمة بس تبل ريقه
نديله نفحة وطريق

والحياة غالية ونار
والأسعار عالدار دمار
واللي عندي آه. ياقلبي
عيشة. زي. الإنتحار

لما عيني تشوف ضنايه
واحتياجه للعناية
و الإنعاس محتاج إنعاش
تبقى حالتي إحتضار