مشيرة موسى تكتب ” عقوبة التجريس “

أحداث واخبار الاسبوع ده كانت صعبة … صعبة بجد … هى الناس جرالها ايه … قصدى هما اللى ” مش ناس دول ” جايين منين …بصراحة اكتئبت … انا اللى كل اللى يعرفونى كويس شايفني دائمة التفاؤل ” بدون لازمة ” … اقر انا الموقع ادناه واعترف ان ” بنزينى خلص ” وانى بقيت خايفة ومرعوبة على العيال والكبار والحيوانات الأليفة والزرع والشجر … فجأة قررت اقعد فى البيت … لقد اتخذت قرارى … مش عايزة اكلم حد ولا عايزة اشوف حد … بناقص … ما هو لما ناس مش متخصصة … او لما ناس فاكرة انها عارفة كل حاجة تفتى فى اى وكل حاجة … يبقى عليه العوض … والله مش قادرة اصدق … نقول كمان … ما هو لما ناس مفروض متعينة فى الحكومة وشغلتها الأساسية انها تراعى وتاخذ بالها من الحيوانات وتبقى هى اللى بتنادى بقتل الحيوانات … يبقى اكيد فى خلل كبييييير … وكبيييير جدااااااااا كمان … ولما العيال الصغيرة اللى بيروحوا المدرسة يتم هتك عرضهم أو اغتصابهم أو التحرش بيهم داخل المدرسة وفى أثناء اليوم الدراسى … والمفروض ان ده يمكن الوقت الوحيد اللى بنكون مطمنين فيه على العيال وعارفين هما فين … يبقى اكيد فى حاجة غلط … عايزة اعرف … ازاى بأااااه الحاجات الغلط اللى مش بتاعتنا ولا كنا بنسمع بيها زادت كده … ومحدش يقول لى ان الحاجات دى كانت موجودة وأننا عرفناها بس علشان وسائل التواصل الاجتماعى … انا عشت سنين عمرى فى المجتمع ده … واشتغلت فى الصحافة من اول ما اتخرجت … يعنى كنا بنعرف ونسمع حاجات كتيييييير … وعمرها ماكانت بهذا الفحش … لا حول ولا قوة إلا بالله … صديقى الدكتور هانى السبكى استشارى الطب النفسى … شايف ان الوجدان المصرى تلوث … شايف ان التمثيليات المليئة بالشتائم ومناظر القتل والتعذيب مع عدم وجود رقابة وزيادة الضغوط المعيشية كل هذا أدى إلى زيادة العنف فى المجتمع … الدكتور السبكى شايف ان حالات ” قلة الأدب ” فى المجتمع لا تواجه … زى زمان … بكلمات مثل خليك مهذب … أو عيب فى ستات أو اولاد صغار قاعدين … وانه مع اختفاء وانحسار الاجيال المهذبة المحترمة وزيادة اعداد الغوغاء أو راغبى عمل
” الترندات ” اصبح على الدولة إعادة تفعيل نظام العقوبات الفورية فى الشارع … زمان واحنا صغيرين كان المتحرش أو مطلق الشتائم الخادشة( فى الشارع ) يتم فورا حلاقة شعره والحبس … الشباب كان بيخاف من العقوبة دى ” عقوبة التجريس ” … يعتقد الدكتور السبكى ان من أمن العقاب اساء الأدب … وانه مازال لدينا الكوادر التى تستطيع إعادة تصحيح الوضع … وانه من الضروري إيجاد إدارة تشبه إدارة المصنفات الغذائية والتى من مهامها الحفاظ على جودة الغذاء … وان علينا انشاء إدارة هدفها الحفاظ على الصحة النفسية للمواطن … ويؤكد السبكى انه حتى الآن … يمكن ان نعتبر الشباب ضحايا المجتمع والميديا والتمثيليات … ولذا علينا سرعة إخراج السموم من اجسادهم … عرفتم بأااااه انا انسحبت ليه وفضلت اقعد لوحدى … انا شايفة ان معظم البنى ادمين ” الا قليلا طبعا ” فقدوا القدرة انهم يكونوا ” بنى ادمين ” …. ربنا يستر عليكم ويحفظكم من ” قلة الرباية ” …