أدب
يُما إندهيلي
ابراهيم طيطى
يُما إندهيلي أنا الفلسطيني
بحب بلادي ، من قلبك يُما إدعيلي
رافع راية بلادي
ودمي وشرياني مسك فلسطيني
أبوس أرضك وترابك
ما يوم نسيت دم الشهيد ونسيتك يا بلادي
ولا يوم نسيت السجين يٌما
ولا نسيت اللي في الزنازينِ
أنا أبن الشهيد وعم وخال الشهيد
أنا أبن المعتقل والأسير الفلسطيني
أحمل بأيدي مقلاع وسكين وبارود
وغصن زيتون بشمالي والقرآن بيميني
أنا المسلم اخو المسيحي
دمي ودمو مسك فلسطيني
ما نخاف المنايا يُما ، رضعنا
حليب الأسود والكرامة من بلادي
أمي الفلسطينية أُخت رجال
اسمها الخنساء حملت البندقية والقضية
وابويَ أصيل فلح بلادي
وغنى للشهيد والاسير ورجال البندقية
أمشي بعتمة الليل يُما
واضوّي قناديلي أنا الحُر الفلسطيني
أنا من سرج الخيل
ما حدا يُما قدر يشتريني
يُما إندهيلي أنا الفلسطيني
دمي ونبضي لبلادي بناديني
………………
بقلمي/ إبراهيم محمود طيطي
الأردن/إربد
