إعلن حداد

إعلن حداد
بقلم / صفيه نصار

انا بكرهك ياقلبي
يانقطة الضعف فيا
وم النهاردة هموت حبي
وغصب عنك تتعلم الأسيه

إياك تاني تحن لأي حد
سألت كتير و من غير رد
ومش هنفضل نسقي جذور الشوك
ونقول عشان خاطر الورد

وادي النتيجه بقينا صفر ع الشمال
لاجينا ع الخاطر ولاع البال
وكانهم ماشافوا حلو معانا
إللى كانوا نجوم سمانا ليالي طوال

مش هنشحت منهم الحنيه
وبالعند فيك وبالعند فيه
هتاخد قرارك من عقلك
وهلغي وجودك واشوف بعنيا

صحيح عيون القلب كلها احساس
بس مش هتنفع لكل الناس
كان لازم ياقلبي تاخد بالك
مطمن ليهم على أي أساس

انا حبيت واديت وحبي كان زياده
والغدر منهم كان فوف العاده
افتح بيبانك للي خارج وإعلن حداد واشرب قهوتك ساده