أدب
هدية ثمينة
بقلمي صفيه نصار
بمناسبة عيد الحب كل سنة وانتم طيبين ودايما حبايب
عيد حب سعيد عليك وعليا
وانت جايبلي اغلي هديه
اعمل ايه انا بالورده
ودبدوب مامنوش فايده
الفرخه دي في شوربتها الدفا والحنية
واي يعني تورته وشمع والع
ادخل عليها بجوز كوارع
بلاش م المظاهر الكدابه
والناس وحوش في غابه
الكل بيجري فيها ويسارع
هاتلك كرتونه بيض بدل الفل
اهي فايده تعم ع الكل
او شنطه من عند العلاف
شوية مكرونه رز سكر شكل ونوع اصناف
واشرب شايك وعلي الله إتكل
بلاش تحملها فوق اللازم
وكل يومين تعزم وتتعازم
وإكسب في نسايبك ثواب
الناس النهارده بتكح تراب
ولاعايزينك تنطط خد بعضك وخليك حازم
حكمة اليوم يابخت من زار وخفف
خليك عزيز النفس واتعفف
بلاش تبلط لهم في الخط
خف تعوم معدش فيها حمام ولابط
إحنا انضف م الصيني بعد الشطف
اه مستني الفرخه تتحطلك ع السفره سالمه
انت دافع دم قلبك مش مجامله
صاحب حق ودي فرخه بيضه
تنفع في ايامكوا السوده
هديه ثمينه حقك تتعامل احسن معامله
