أدب
أنا الفرعوني
أنا الفرعوني
عبد الحفيظ جابر شيبه
أنا الفرعوني وحين ولدت
أهلي ف الحرير لفوني
يعني سليل الملوك
وأصحاب الجلالة
يعني من أحسن سلالة
كيف يجي علي يوم يا بلدي
وأكل من صناديق الزبالة
والله دي تبقى أكبر إهانة
وكمان وأنا ماشي ف بلدي
ألاقي اللي يقبض علي
عايز البطاقة خد البطاقة
طيب سيبني واشحلك الباقة
لأ هاخدك للشرطة رزالة
لأني شوفتك وانت بتاكل
من صناديق الزبالة
تبقى انت متسول
وماشي ف الشارع
عامل ف الطريق حالة
يا باشا سيبني
أنا بيتي إتهدم
في اخر إزالة
وممكن أرسل معاك رسالة
أنا جدي كان وكان
الباشا فلان والبيه علان
أخرتها أتحبس علشان جعان
إدخل هو انت حد
عارف لك أب ولا أم ولا خالة
شكلك كده من الحثالة
وفي السجن ألقوني
وانا المصري وجدي فرعوني
واهلي يوم ولدت
ف الحرير لفوني