إنت ماشي ليه؟ سؤال بسيط… بس إجابته بتغيّر حياتك
في وسط الزحمة والضغط والجري من غير توقف، الهدف بقى الفرق بين اللي مكمل واللي واقع من التعب
كتب / احمد صلاح
فيه ناس كتير عايشة اليوم بيومه،
تصحى تخلص اللي وراها، وتنام، وتصحى تاني…
من غير ما تسأل نفسها:
هو أنا بعمل ده ليه؟
السؤال ده بسيط، بس تجاهله هو السبب الحقيقي لتعب ناس كتير.
الهدف مش رفاهية، ولا كلام تحفيزي نسمعه وننساه،
الهدف هو الحاجة الوحيدة اللي بتخليك واقف على رجلك
وانت الدنيا كلها شدّاك لتحت.
ناس كتير فاكرة إن الهدف لازم يبقى كبير قوي:
فلوس، شهرة، منصب.
بس الحقيقة إن الهدف أحيانًا بيبقى أبسط من كده بكتير:
إنك تبقى أحسن من نفسك امبارح،
إنك تطلع من دايرة الغلط،
إنك تعيش مرتاح ومش مكسور.
المشكلة الحقيقية إن ناس كتير
عايشة أهداف مش بتاعتها،
ماشيين ورا كلام الناس،
ورا ضغط المجتمع،
ورا “لازم” و“المفروض”
من غير ما يفكروا هم عايزين إيه أصلًا.
وعشان كده تلاقي واحد ناجح في نظر الكل،
بس من جواه فاضي وتعبان.
وتلاقي واحد تاني بسيط،
بس عارف هو رايح فين،
وعارف يستحمل عشان عنده سبب.
الهدف الحقيقي مش اللي يخلّيك مشهور،
الهدف اللي بجد هو اللي يخلّيك
مرتاح وانت لوحدك،
راضي عن نفسك،
فاهم إنت بتتعب ليه.
رسالة لكل الناس #
قبل ما اليوم يخلص،
اسأل نفسك سؤال واحد بس:
إنت مكمل ليه؟
لو لقيت الإجابة،
صدقني نص الطريق بقى واضح،
ونص التعب هيخف،
حتى لو المشوار لسه طويل
اوصل أنجز فكر عيش هدفك توصل لحلمك وتعمل المستحيل اهم حاجة تكون مقتنع بنفسك قبل اي حد
