( لو كان فيكوا الخير)

اقتنعت النهارده بإن عادي جدا نكمل من غير شخص كان كل حاجه في حياتنا.

عادي جدا نرجع لوحدنا بعد كل الكلام والوعود اللي اتقالت.

بعد كل الضحك والهزار اللي كان بينا.

عادي نكمل من غير شخص كانت النظره ليه تساوي الدنيا كلها. وعادي جدا نكون لسه بنحب الشخص ده جدا ونتمناله الخير. بس خلاص اتعودنا علي غيابه. يمكن الحاجه الوحيده اللي بتفضل موجوده شوية أسئله ملهاش اجابه

احنا ليه مكملناش؟!

انا حبيت بجد حبيت من كل قلبي.

ليه الحب ده ميكملش؟!

ليه يكون قلبي فاضي مابحسش حتي انه بيدق؟!

بعد ما كان مليان بأحاسيس كتير كنت بحس بيها اني عايش!

معرفش اللي جاي ايه بس دايما بقول اكيد خير….

أصعب أنواع التعلُّق في نظري إنّك تبقى متعلّق بروح بني آدم.

متعلّق بتفاصيله بمواقفه بالذكريات اللي بينكوا.

الشخص مُمكن يتوجِد له بديل عادي.

لكن الروح واحدة ومالهاش بديل

المواقف اللي عِشناها والذكريات اللي حصلت بينّا صعب تتبدّل أو تتنسي وده علشان إحنا كُنّا صادقين في كُل حاجة بنعيشها فطبيعي إن المواقف والذكريات دي تتحفر جوّانا.

علشان كده إحنا لما بنزعل على فُراقكُم بيكون زعلنا على نفسنا وعلى العِشرة والمواقف اللي كانت بينّا.

لكن عُمرنا ما زعلنا عليكوا إنتوا

لإن لو كان فيكوا الخير كُنتوا حافظتوا علينا وصُنتوا الود وعملتوا بالمعروف والأُصول.