مقالات
من الواقع
د.صالح العطوان الحيالي
ايباه من كنا صغار نتصرف تصرفات ما انزل الله بها من سلطان .كنا لانعرف الاهتمام ولا نعرف المسؤلية ولا نعرف الحرص ولا نعرف ولا نعرف مجرد صغار بعقول طايشة همها اللعب والاكل . وكنا نريد نعرف ليش ابونا يفتر يطفي الگلوبات الزايده ؟ ويفتر يتأكد من الحنفيات ؟
و يتأكد من ريحة الغاز ؟
و يصيح لمن واحد يطبگ الباب حيل ؟
تدري شنو ألي يخليه ينصحنا بكلام مكرر و هو متأكد نحن مراح ننفذه ؟!
تدري ليش يتضايق ويمكن أكثر منا من نستلم الشهادة ودرجاتنا مو زينه ؟ تدري شنو ألي يخليه فرحان جداً و مرتاح نفسياً و نحن نصرف فلوسه بحاجه زينه ؟
تدري شنو الضغط والسكر من وره العصبيه وعلى شغلات من وجهة نظرنا (( تافهه ))؟
أني چنت مثلك ما أدري ليش !!!!
بس لمن كبرت و لگیت نفسي تلقائياً أسوي هاي الشغلات ، فهمت السر …
(( المسؤولية )) إلي تخليك تفرح و تستمتع بإبنك وهو ياكل و يشرب و يلبس و يصرف .. أكتر من فرحتك و متعتك إنت شخصياً لما تآكل وتشرب وتلبس .
(( المسؤولية )) إلي تخليك شايل هم مستقبل إبنك في الوقت إلي هو نفسه ما مهتم بالحاضر ..
ببساطه يعني مثل واحد راكب بصف سايق ، إنت تنام و تگعد و تباوع من الجامه مره و تلعب بالموبايل مره ، و هو لازم الستیرن و عينه على گیجات البنزين والدهن و الحماوه و الکیلومتر و الطريق ..
من تكبر راح تحس بهذا كله ..لأنك بإختصار .. راح اتصير أنت السايق ..
وإلى أن يجي هذا اليوم وتصير سايق لازم تعرف أن مجرد وجود حذاء أبوك گدام الباب منظر لايقدر بثمن .
