مشيرة موسى تكتب ” كلام حريمى جدااااااااا “

شوفوا احنا وصلنا سنة كام ولسه محتاجين نقول ونكتب الكلام ده للأسف … بصى يا بنتى … العلم والمذاكرة ده مكسب لك انت بس … يعنى بالعربى الفائدة هتعود لك انت شخصيا … ابويا الله يرحمه كان بيحب خلفة البنات وبيفتخر بينا … عمره ماحسسنا انه زعلان او مكسوف مننا … كان بيعتقد ان الاستثمار الحقيقى هو الاستثمار فى التعليم … الفلوس بتروح وتيجى لكن التعليم وتدريب المخ على التفكير الصح ده حاجة تانية … التعليم هيساعدك على التصرف السليم فى كل وقت وكل مكان … فى الشارع والشغل ومع جوزك وفى تربية أولادك بعد كده … يعنى استثمرى وقتك وانت صغيرة وفاضية وقابلة للتعليم فى تعلم لغة …اكتساب مهارات التعامل مع الكومبيوتر … تنمية هواية عندك … قريب هكلمكم عن بنات وستات نجحوا وحققوا المال والشهرة بعد ما ركزوا فى الاستثمار فى هواياتهم اليدوية … الحلوات دول بينزلوا معارض جماعية تحت اسم ” I make this ” حاجة فعلا فخمة جدااااااااا … صناعات يدوية مصرية لا مثيل لها … ليه انا باقول الكلام ده دلوقتى … علشان شوفت وسمعت حكايات لبنات افتكروا ان الجواز بدرى هو منتهى الأمل … معملوش حساب غدر الزمان … للأسف نتيجة وفاة الزوج أو غدره … الست لقت نفسها ” ورقة فى مهب الريح ” ربنا ما يحكم على حد فيكم … كنت باسمع عن ” سلاح العلم ” … والحقيقة مكنتش فاهمة زمان معنى وأهمية الكلمة … ارجوكم نموا المهارات الخاصة … مش عيب مشروعك الصغير انك تكونى طباخة ماهرة أو أنك تكونى بتشتغلى تريكو أو كروشيه … ارجوكى عايزاكى تفهمي وتتاكدى انك انسان كامل مش نص … الجواز حاجة حلوة بس لما يكون العريس ده بيقدرك ويحترمك كإنسانة … لسه شايفة اعلان لعريس متعلم عنده ٥٠ سنة طالب فيه شروط عروسته الرابعة … ذكر فى الاعلان طلباته ان تكون آنسة فقط … وطبعا اشترط سنها ولونها وشعرها وطولها ووزنها … لم يذكر شيء عن تعليمها أو مستواها الثقافي أو العلمى … اللى يقرأ الإعلان هيعرف ان العريس شخص ميسور الحال عايز يقضى وقت كويس لبعض الوقت
” فى الحلال ” …
النصيحة الفصيحة الاخيرة اللى عايزة اقولها … وعارفة انها مش هتعجب البنات … بس هقولها واخلص ضميرى … الحجاب يعنى التزام … مش قده بلاش منه … الحجاب مش ايشارب … الاحتشام مطلوب … البنطلونات الضيقة جدااااااااا مش حجاب … البلوزات القصيرة جدااااااااا مش حجاب … الفساتين المكسمة جدااااااااا مش حجاب … الهزار مع الصبيان بالايدى مش حجاب … مش عايزة افسر اكتر من كده … الحجاب احتشام … والاحتشام مطلوب مع الحجاب ومن غير حجاب …