مشيرة موسى تكتب ” المال لا يصنع الرجال “

فاكرين زمان لما كان حد من الكبار بيسأل العيال الصغيرة ” نفسك لما تكبر تشتغل ايه ” … فاكرين الردود كانت بتبقى ايه … دكتور … مهندس … ظابط … وكان فى لعب بلاستيك كتيييييير فيها ادوات تصلح للعب بيها لتحقيق هذه الأمنيات البريئة … وطبعا مش قادرة انسى شكل العيال المساخيط وهما لابسين بدلة الضابط فى العيد وعليها نياشيين تصلح لشخصية وهمية تكون نجحت فى ” غزو القارات وعبور المحيطات وطلوع الكواكب كمان ” … انا شخصيا اخر مرة سمعت السؤال ده كان موجه لبنت صغيرة وكان الرد المحفور فى مخى حتى الآن هو ” الصبح دكتورة وبعد الظهر فى البوتيك بتاعى وبالليل رقاصة ” … يعنى البنت ما قصرتش … وكانت محددة ودقيقة جدااااااااا … البنت دى دلوقتى من اشطر المدرسات اللى شفتها … وعملت دراسات متقدمة جدااااااااا علشان تعرف تتعامل مع الأطفال اللى بيحتاجوا معاملة خاصة … ما شاء الله عليها … ليه بأااااه المقدمة الطويلة دى … وانا بقلب اشوف اخبار الرعية على الفيس بوك او التيك توك … مش فاكرة … شوفت عيال قمرات ” هايفة جداااااااا ” وواضح ان اهلهم من طبقة ” الأغنياء بالصدفة ” … لما سألوهم قالوا … ” ليه نشتغل … احنا اغنياء ” … والحقيقة ان ده ازعجني جدااااااااا … يعنى هما كده لا عندهم اى قيمة للمال أو للعمل … وهما دول اللى أهلهم بيشترولهم كل حاجة … بما فيها الشهادات والمراكز … وبالصدفة انا كنت شوفت من فترة لقاء مع احد اغنياء مصر المعروفين بيحكى انه فى الصيف وهو صغير كان بيسافر بره يشتغل … وانه كان بيدى ولاده مصروف محدد … وانه مربى اولاده هو ومراته على الأصول والاحترام … والحقيقة انا شخصيا ما سمعتش عن مشاكل عملها ولاد اغنياء الأصول … لكن سمعت عن بلاوي عملها اولاد الأغنياء بالصدفة … الخلاصة ان الفلوس مش كل حاجة … حتى لو بدت انها المخلص لكثير من المشاكل … انا متأكدة ومقتنعه ان لو ربينا عيالنا صح … كل حاجة هتيجى فى ميعادها … انا مقتنعة جدااااااااا ان ” المال لا يصنع الرجال ” وان أسس التربية بتيجى من البيت … وان المدرسة والمدرسين عليهم دور كبييييير جدااااااااا … انا اصحابى من المدرسة … كل ما نتقابل بندعى بجد ومن قلبنا لمدرسينا من ابتدائي للثانوي … اكيد كان لهم دور كبير فى تكوين شخصياتنا … واخيرا لازم تشوفوا اصحاب عيالكم … ممكن يهدوا اللى عملتوه فى لحظة … انا مش عارفة الحاجة اللى نفسى فيها دى تعتبر “رجاء … ولا أمل … ولا حلم ” … اللى مش عاوز واللى مش فاضى يربى عياله مايخلفش … البلد مش ناقصة … العيال مسؤولية كبيرة ربنا يعينا عليها … أمانة يا جماعة ” ربوا عيالكم ” …