أدب
عالمحطة
الحاج هلال
………………..
عالرصيف عند المحطة
كل حاجة عاوزه زبطة
واللي واقف قلبه خايف
والضعيف هيجيله جلطة
المكان ما فهوش أمان
من زمان مستني غلطة
والمخيف بعد اللي كان
إيه جرالي زاد وغطى
نبضي ضغطي آه ياقلبي
دالكلام جد مش أونطة
ماشية جنبي ولابسة بمبي
عالمحطة وجايلي ضيف
نط نطة وعالرصيف
عنده شهوة شاي وقهوة
بس مش لاقي الرغيف
والرغيف محتاج لحنطة
روح ليوسف هاتلي شنطة
غله لسه في السنابل
غاليه بس من غير مقابل
للي جاي من أيي حتة
والمهم الشخص جتة
القوي زي الضعيف
بالتساوي في الرغيف
والركوبة عالرصيف
والرصيف معمول منطة
مره بطه. ومره قطة
وكل نطة عاوزه لقطة
راح نشوفها نقطة نقطة
إللي ماشي ونفسه ناسي
ماشي بشكي فين معاشي
واللي حالفه تمشي حافية
ليه حبيبي خد. مداسي
واللي نادرة تبقى تاجرة
في البهايم والمواشي
واللي ماشيه بكعب عالي
بالفيونكه. وشاغله راسي
واللي عرجة بس خارجة
عالكراسي وقلب قاسي
بيبصوا وعاملينها فرجة
شخص قاعد ظهره ساند
سانده وسطه وقلبه جامد
في المحطة وعنده سلطة
وعالرصيف مسنود نضيف
كرسي له مسند وشلتة
والجميع عامله زيطة
بس يقعد جنب حيطة
عالرصيف آخر المحطة
مع لفيف شغل الأونطة
عب رؤف دبح الخروف
وعب لطيف ماسكله بلطة
والعنيف عاملي شيف
للطبيخ ماسكلي سيخ
الضعيف ياخدله فرخة
والكفيف عاملي شيخ
بيدخن ويشم نفخة
والقريب مستني نفحة
والشديد يطلع بشنطة
والبعيد بتروحله بطة
وكل شيخ وله طريقة
والطريقة ليها فكة
والمهم تفك. ضيقة
ضيقة لسة فيها خنقة
، عالرصيف وعالمحطة
والنضيف بيبيعلي خلطة
دالرغيف صغير خفيف
و الجعان محطوط في ورطة
والغني غبي و سخيف
م الشبع بيجيله زغطه
والموظف. ماشي يرشف
والمريض كان ناوي يكشف
مع بشاير كل مشمش
عالرصيف وعالمحطة
جاتنا خيبة وحاجة تكسف
كل حاجة وليها حطة
واللي جاهل بكره يعرف
……………………
عالمحطة
بقلمي الحاج هلال
