أدب
•• ~ثوب الرضا~••
طلعت عامر
الهدوم دابت علينا
والشقا شقشق ايدينا
والعذاب بقى بينادينا
همنا بقى شئ أساس
أمتى يوم هتفرحينا ؟
أمتى حلمك يبقى لينا ؟
أنت ليه بتزعلينا ؟
ولا غضبك له أساس!
فصليلنا ثوب أمان
ثوب بيسمع للأذان
يجرى يركع فى الألوان
ثوب ضمير يملى المقاس
فصليلنا ثوب رجولة
ثوب بيقدر ع الحمولة
ثوب يعيش دور البطولة
ثوب يحبب ناس فى ناس
فصليلنا من المحبة
ثوب يخلى الناس احبة
جميعيهم حبة حبة
فوقيهم م النعاس
فصليلنا ثوب رضا
يحمى من شر القضا
ثوب يحلق فى الفضا
وأعمليلنا الثوب نحاس
واعملي الثوب للجميع
للشريف او للوضيع
وأوعى يبقى الثوب رقيع
أو يكون لناس وناس
•°¿طلعت عامر ¿°•