مشيرة موسى تكتب ” ماما بتسلم عليكم “

كل عام وانتم بألف خير … عام هجرى جديد سعيد عليكم وعلى كل الحبايب … مش فاكرة ليه جدتى كانت ما بتطبخش رز فى اول يوم من السنة الهجرية الجديدة لكن فاكرة انها كانت ” بتفتح ” فطيرة … الواحد باين بدأ ينسى العادات والتقاليد بتاعة كل مناسبة … فقلت افكركم بشوية حاجات من اللى ماما الله يرحمها علمتها لنا زمان واحنا صغيرين … علشان تفتكروا تعلموها لعيالكم … قبل العادات دى ما تندثر برحيل الاجيال اللى انا منهم …
* ماما بتسلم عليكم وبتقول لكم علموا عيالكم يقولوا … شكرا … من فضلك … لو سمحت … عن اذنك …
* ماما بتسلم عليكم وبتقول لكم علموا عيالكم لما الكبار يبقوا بيتكلموا فى موضوع مهم … ما تتدخلوش …
* ماما بتسلم عليكم وبتقول لكم علموا عيالكم يقولوا حضرتك مش انت …
* ماما بتسلم عليكم وبتقول لكم علموا عيالكم يقعدوا عدل وما يحطوش الجزمة فوق الكرسى فى الأماكن العامة …
* ماما بتسلم عليكم وبتقول لكم علموا عيالكم لما يكونوا قاعدين فى المواصلات أو فى اى مكان انتظار ويكون فى واحدة ست او راجل كبير واقف يقوموا. ويقعدوهم …
* ماما بتسلم عليكم وبتقول لكم علموا عيالكم بعد الأكل يدخلوا طبقهم فى المطبخ اذا كانوا صغيرين … ويغسلوه اذا كانوا كبار … علموا ولادكم ازاى يوضبوا سريرهم … علموا ولادكم مكان الهدوم النظيفة ومكان الهدوم اللى عايزة تتغسل … علموا ولادكم النظام …
* ماما بتسلم عليكم وبتقول لكم علموا عيالكم ان الصوت العالى والتنمر والتريقة على خلق الله فى الأماكن العامة مرفوض مرفوض مرفوض …
* ماما بتسلم عليكم وبتقول لكم علموا عيالكم ان السرقة والمخدرات جريمة مش ” ترند ” …
* ماما بتسلم عليكم وبتقول لكم انتم شخصيا ان خلفة العيال مسؤولية … فلو مش قدها … بلاها خلفة … علشان بصراحة انتم زودتوها جدااااااااا … والعالم بدأ يعانى منكم ومن عيالكم ” الكوول ” … ولو مش حاسين ادخلوا شوفوا فيديوهات العيال على وسائل التواصل الاجتماعى والتيك توك … وربنا يستر على العالم …