الواحد مش عارف يلاقيها منين ولا منين … انا مش بصدق كلام الطالع والذى منه … ساعات بالصدفة بشوف الناس الحلوة دى اللى مطلعة على المستقبل وبتجيب لنا الاخبار قبل ما تحصل … لكن دايما وفى قرارة نفسى مقتنعة انه ” كذب المنجمون ولو صدقوا … الجماعة دول حذرونا من سنة ٢٠٢٥ قبل ما تهل … وانا مقتنعة ان ” تفائلوا بالخير تجدوه ” … وكمان ” قل لن يصيبنا إلا ما كتب الله لنا ” … لكن الحقيقة السنة بادية بداية صعبة شويتين تلاتة … طيارات بتخبط فى بعض ولا كأنهم ماشيين على الارض فى ميدان العتبة … موظفين محترمين بيهون عليهم نفسهم ويقرروا ينهوا حياتهم … شباب بيرحلوا … حرائق فى كل أنحاء الدنيا … زلازل وبراكين … لا دا غير استغلال الميديا فى زرع ” قضايا مرفوضة تماما ” ومع تكرار العرض واللت والعجن … تتحول هذه القضايا غير المقبولة إلى احتمالات مطروحة … لا حول ولا قوة الا بالله … ” استرنا يا رب ” … الشتاء باين كان ناسي الأيام اللى فاتت انه موسم البرد … وبعدين بدأ يتذكر فاختار قسمة العدل … الصبح كانت الشمس طالعة وعايشة حياتها والبرد اختار يكون من بعد المغرب لحد الفجر … فجأة باين حد عايره ولا وجه له كلام سخيف … وسمع الستات بتقول ” امال اشترينا البلاطى ليه ” … الشتا بأااااه ثار وهاج وماج وقرر يبدأ بجد مرحلة الصقيع … ربنا يستر على الناس الغلابة وكبار السن … ” استرنا يا رب ” … العيلة واللمة والأصحاب والحبايب دول ناس ما تتعوضش … دول السند والضهر … دول مصدر الفخر والقوة … اتصور ان الفرد لوحده ممكن يكون ضعيف وقابل للثنى ومش هقول للكسر … فاكرين قصة الأب اللى استدعى أولاده واداهم كل واحد عصا وطلب منهم يكسروها فكسروها بسهولة … لكنهم فشلوا انهم يكسروا العصيان وهى فى حزمة … انا بحب اللمة دى والعزوة دى … ربنا ما يحرمنا منها ” استرنا يا رب ” …
