أكيد بُكرة اللي جاي أفضل
أكيد بُكرة اللي جاي أفضل
سلوى صبح
اوعى تندم على العِشرة
ولا تحزن …
على أيامك الرايحة
بدون رجعة
ولا تبكي
على سنينك الغالية
في يوم أبدًا..
أكيد بكرة اللي جاي أفضل…
كل اللي فات من عمرك
كان مكتوب ومتقدر
إياك تفتكره وتتحسر
بدمع العين وتتأثر..
أكيد بكرة اللي جاي أفضل..
صحيح الفرح غاب عنك
وراح أملُك ساعات مِنْك
بَكيت م الحُرقة وقلبك ادمر..
أكيد بكرة اللي جاي أفضل..
كتير عدت عليك فترات
كآبة الدنيا كانت فيها بتمطر
وقلبك فيها كان
يا حزين مكسور وبيفكر..
أكيد بكرة اللي جاي أفضل…
حاولت كتير وما انهزمت
وروحك بكل برائتها
غرقانة في غَمَّها بتتصبر
على الأيام وبلاويها
برغم قلبك الأخضر..
أكيد بكرة اللي جاي أفضل…
تدِّب فيك الحياة لحظات
لكن شبح الموت ماشي
جوة وريدك بيتمختر..
أكيد بكرة اللي جاي أفضل..
سكت كتير
قاومت قليل
بس العافية في خطوتك
تاهت بتتكسر..
لمين تِشكي؟
تجيب منين حد تحكيله
وكل الكون واقف حواليك
في المِحن عمره ما يُنصُر..
أكيد بكرة اللي جاي أفضل…
خلاصة القول:
بلاش تِهلِك عقلك
وتهِّد بالحزن قلبك
لعمرك ينتهي أسرع..
أكيد بكرة اللي جاي أفضل…
ولا تبكي على بكرة
يجي بعده نور الصبح
يفرح قلبك المسكين
تفاءل يا حزين القلب
كريم ربك
ما ينسى عَبدُه
أكيد بُكرة اللي جاي أفضل
