Uncategorized
( رثاء ) أختي الغالية ( فراقك نار )
عصام السعدنى
بعدتي خلاص وسيبتيني…
اقاسي في دنيتي الوحدة..
وحزن الكون سكن قلبي…
ونار قلبي ولا بتهدى…
أكيد إنتي في مكان أحسن…
وده مخليني متطمن…
وبدعي ربي يغفرلك…
ويرحم قلبك الطيب…
وروحي تملي بتقولك…
فراقك عننا أصعب…
من الأصعب…
فراقك عننا يشيب…
لكن طيفك بيحضنا…
وعلى اوجاعنا بيطبطب…
وبيبرد قلوبنا كمان…
وصوتك لما بيدوي…
بيبقى في ودني ناي وكمان …
وبسماتك حنين وحنان…
ونسماتك تريح قلبنا التعبان…
ولمساتك على كفوفنا…
تدفي جسمنا البردان …
في عز الليل …
وتشفي بنظرة من عينك…
بقايا عليل…
مالوش عند الطبيب وصفة…
ولا حتى في طب بديل…
دموعي كل يوم بتسيل…
بتحرق قلبي وضلوعي..
بتطفي سعادتي وشموعي..
تزيد من مر أوجاعي..
بلا داعي…
وأقوم داعي..
ورافع صوتي ودراعي..
أناجي ربي يغفرلك..
يسامح روحك الطاهره..
ويشفي قلوبنا م القهرة..
يصبرنا على بعدك…
يشيل من قلبنا الغبرة..
ويرحم نفسك السمحه..
يا قلب أبيض وروح صافية..
تملي في عز أوجاعك…
بتنسي الشر ومسامحه..
بكلمة حب من قلبك…
تكون لينا شفا وعافية..
ومن عينك تطير لمحة..
تطمن قلبنا المكلوم..
وتنصر حسنا المظلوم..
تفرحنا.. تريحنا..
تنسينا العذاب واللوم..
لكن دلوقتي يا خسارة..
فراقك عنَّا خلانا..
قلوبنا تملي تعبانه..
ومليانه..وجع وهموم.
بقلم
عصام السعدني.
