ولاد الأصول
بقلم : علا خضير
ولاد الأصول مش من السهل تتلخبط فيهم لأن كل أفعالهم بتحكي عنهم من غير ما يكون متعلم عليهم بقلم فسفوري أو حد يشاورلك عليهم .
ولاد الأصول أخلاقهم بتحكي تفاصيلهم من غير ما يتطلب منهم ، تلاقي إحترامهم لكلمتهم تاج على رأسهم ، موجودين دائما وقت الشدة قبل الفرح تلاقيهم واقفين جمبك .
أبن الأصول حين يعطي ينسى مكانته ، وحين يأخذ لا يتذكر إلا كرامته ومكانته ، له عزة في العطاء وذله في الأخذ ، مينكرش فضل الناس عليه ولا ينساه لاخر لحظه في عمره دائما فاكر اللي أتقدمله ، روحه راقيه لا يتلاعب بمحتاج ، ولا يخدع مضطر ، ولا يرد الوقاحة بمثلها وذلك ليس ضعفآ منه ولكنها تربيه نشأ عليها وبها .
أبن الأصول تجده عندما يطلب الشئ يطلبه بأدب ، يمزح بذوق ، يعتذر بصدق ، ويختلف معك برفق ، تجده دائما جابرآ للخواطر يوقر الكبير ويرحم الصغير ، والضعيف عنده قوي حتى ينصره .. والقوي عنده ضعيف حتى يأخذ الحق منه .
أبن الأصول تلاقيه دائما يحب الخير لغيرة زي ما يحبه لنفسة ، ولا يتمنى زوال النعمة عن غيرة .
ولاد الأصول ناس بتجبرك تحترمهم وتعاملهم معامله خاصة بيهم ، ناس بتجبرك تنقي مواضيعك وكلماتك معاهم ، ناس بتجبرك تطلع أحلى ما فيك وأنت معاهم .
ودايما هتقابل في حياتك ناس مفيش بينك وبينهم عشرة ولا عيش وملح وهتلاقيهم أجدع مليون مرة من ناس بينك وبينهم عشرة وعيش وملح ، وانك تعرف أنسان واكلت معاه عيش وملح حاليا مبقاش ضمان كافي للإخلاص وإستمرار الود ، ساعات بيبقى ولا ليهم أي أعتبار مع قليل الأصل وفقير المبادئ .
ولازم تفهم أن مفيش حاجة أسمها بيني وبينه عشرة لكن في حاجة أسمها بيني وبينه مواقف كان فيها ضهري وحمايتي وجدع معايا ، هو دة عيش وملح ولاد الأصول « الأفعال لا الأقوال » فالجميع متكلم لكن القليلون فاعلون .
وطبعا جميعنا متفقون اننا نقدر أن نسامح في معظم الاشياء إلا قلة الأصل صعب أو منقدرش نسامح فيها ، لما أئتمنك فتخوني ، لما أحسن إليك فترد بالإساءة ، لما أفضفضلك فتتكلم في ظهري ، لما أحبك وتأذيني ، لما توعد وتطلع كل وعودك مزيفه ، لما تبقى قدامي بوش وورايا بميت وش ، صدقوني دة مش طبع دى أسمها قله أصل ، عشان كدة أمسك في ولاد الأصول وخليهم دائما جمبك دول نعمه وأحلى رزق .