سؤال مالوش عند الطفل إجابة

كتبت / علا خضير

ليه عملت كده؟ سؤال بنضر بيه أولادنا من غير ما ناخد بالنا… ده السؤال المخصص للكوارث: ليه كسرت الفازه؟ ليه ضربت اخوك؟ ليه شخبطت على الحيطة؟ و هكذا…

سؤال مالوش عندالطفل إجابة، و بيعلمه لما يكبر يلاقي حجج لأخطائه و يهرب من مسئولياته.

تخيل كده حد بيسألك: ليه ماخلصتش شغلك؟ ليه زعلتي مامتك؟ ليه اتأخرت على ميعادك؟… هتلاقوة سؤال مش مريح و صعب و بيحسسك انك متهم و محتاج تدافع عن نفسك.. سؤال ليه ده بيحتاج مننا تركيز و تحليل، نربط تصرفاتنا بالأفكار اللي خليتنا نقوم بيها، نشرح الدوافع اللي خلتنا نعمل كده و نقدم عذر منطقي للي بيسألنا علشان نبعد عننا الاتهام و نتجنب العقاب.. مجهود ذهني و نفسي صعب على الشخص الناضج فما بالك بطفل قدراته المحدودة لسه مش مؤهلة للتفكير التحليلي ده.. غير ان الخوف اللي هو حاسس بيه لأنه أخطأ هايخليه مش عارف يفكر .

الطفل إما هايفضل يفكر و مش هايلاقي رد فيسكت، أو خوفه من العقاب هيخليه يخترع كدبة على أمل انها تنقذه (“مش انا اللي كسرتها”) أو لو كبير شويه ممكن يلوم حد تاني خلاه يعمل كده (“هو اللي زقني الأول”)..

في كل الأحوال غضبك هايزيد و هتعاقبة لأنه كمان استفزك بسكوته او كدبه او حجته..

طيب يا ترى هو كده اتعلم ايه؟؟!!

المشكله مش بتقف هنا.. مع تكرار المواقف و سؤال ليه الطفل بيتعود انه يفكر بهدف انه يلاقي أسباب لأخطائه تكون خارجه عن إرادته علشان اللوم مايبقاش عليه و يتجنب العقاب.. كأننا بندربه لما يغلط يلاقي الحجج المناسبه اللي تعفيه من المسئولية و يبقى قدام الناس و قدام نفسه ضحيه مش متهم..

هو ده الطفل اللي لما يكبر هايبقى الطالب اللي جاب نمره وحشه علشان المنهج هو اللي صعب، طردوه من الفصل علشان المدرس هو اللي مضطهده، خبط العربيه علشان الناس هي اللي مش بتعرف تسوق… و هكذا، دايما حد تاني هو اللي مسئول عن أخطاءه مش هو.

طيب ايه البديل؟ خلي تركيزك علي الموقف نفسه مش أسبابه (السبب ببساطه انه طفل.. مندفع و بيغلط و لسه بيتعلم)

إسأله هو ايه اللي حصل؟ علشان يتعلم يحكي .

إسأله نعمل ايه دلوقتي؟ علشان يتعلم يلاقي حلول .

إسأله ازاي ده مايحصلش تاني؟ علشان يتعلم يعمل خطه و يمشي عليها.

خليه يتحمل و لو جزء من مسئولية الغلط على حسب سنه، مثلا لو حاجه اتدلقت هو اللي يمسحها و اشكره ، لو شخبط على الحيطه يغسلها و انت بتشجعة..

أي موقف سيء تقدر دايما تحوله لفرصه الطفل يتعلم منها، من غير ما نسأل سؤال مالوش إجابه أو نعاقب عقاب مش هايعلم ولادنا المهارات اللي هم محتاجين يتعلموها .