يا مصري
يا مصري
احمد محمود عوض
يا مصري بلدك في شدة
وعين الشر بصالها
محتل ساقه الطمع
في ولادها وفي مالها
و الأخ غلبه الطيش
ومراده اذلالها ..
وابن ضل الهدى
بيقطع في أوصالها
مع إن شحمه ولحمه
كله من مالها…
تشوف فعاله
كأن مصرمش بلده
ولا إنه آمن بها
هوا ولا ولده
ولا ارتوى م النيل
ولا قمحها حصده
ينخر لحد القاع
عاوز يوصلها
مصر في مفارق طرق
اجري و حصلها
ومد ايدك لها
لما توصلها..
ملهاش بعدك سند
غير ربنا وقالها..
في رباط ليوم الدين
ما في غريم نالها
———-
شيل الغشاوة
وبص ع اللي قدامك
حافظ على الأزهر
ودير العذرا واهرامك
كحل عيونك بطمي النيل
واسمع له
على ضفة النهر
حضارة صاغها أجدادك
حسدوك عليها
جميع الخلق واتآمروا
ياخدوا ميراثك
وباقي الحق لاولادك
———-
وطن مرادهم هزيمته
وينكسر بايدك
عصى عليهم ينحني
غير للإله سيدك
وانت الوحيد الأمل
طبطب عليه بايدك
وخد بإيده ومهد بكرة لاولادك
———-
تنام ازاي ؟!!
ومش آمن على عرضك
تعيش ازاي؟!!
وبكرة الأرض مش أرضك
يرضيك ولادك تتوه
في السكة مش لاقية
لا بيت يسعهم
ولا يجروا على حضنك
———-
اصبر على بلدك
شدة وهتعدي
ماتكونشي ثغرة
ياخدها عدو ويعدي
فوت عليه فرصته
لا الوقت هيعدي
ولا يجرفك تيار
ولا الهوي يودي
قبل الندم لا يفيد
ولا البكا يجدي
مالكش غير بلدك
راعي فيها ربك
