تاخر الكلام عند الاطفال

وفاء سليمان محمد

نقلا اخصائين التخاطب

​​​من المشاكل اللي بتواجه اولياء امور كتير و الاكثر اهميه بعد مشكلة #تأخر_الكلام هي #اضطرابات_النطق و بيسألوا الاسئله المعتاده زي
ابني بيتكلم بس عنده حروف واقعه .. بنتي مش بتقول حرف الراء .. ابني بيقول ال جيم دال و الكاف تاء و خاء حاء و الشين سين و مش باقي الا كام حرف بيقولهم كويس نعمل ايه معاهم … ؟؟
فيه كذا سؤال لازم اسأله كمختص عن الطفل قبل ما نقول نعمل ايه ؟؟
هل الطفل لغته مناسبه لسنه ؟
هل الطفل بيعاني من اي مشاكل عضويه في اعضاء النطق ؟
هل حد من المحيطين بالطفل في البيت او الحضانه عنده لدغه ؟

**اضطرابات النطق :
هي صعوبات في نطق الاصوات اللازمه للكلام و خروج هذه الاصوات بشكل غير سليم
قد تحدث هذه الصعوبات في صورة مشكله في نطق صوت معين في اول او وسط او اخر الكلمه
**انواع اضطرابات النطق :
الحذف : يحذف الطفل صوتا من الكلمه يصعب نطقه او مقطع من الكلمه
الابدال: يستبدل الطفل صوت يسهل نطقه مكان الصوت الاصلي في الكلمه
التحريف : اصدار صوت بشكل غير سليم باسلوب خاطئ و محرف عن الصوت الاصلي
الاضافه : اضافه صوتا او مقطع صوتي يمكن تمييزه او غير مميز و تكون الاضافه في اول و ووسط و اخر الكلمه
**يعني ايه لدغه؟
هي اضطراب من اضطرابات النطق و هي ناتجه عن عدم القدره على اكتساب النطق السليم لبعض الاصوات اثناء النمو الصوتي

**انواع اللدغات:
الدغه سينيه : اللدغه السينيه الاماميه – اللدغه السينيه الجانيه – اللدغه السينيه البلعوميه
اللدغه الرائيه : تحدث نتيجه خطأ في نطق صوت /ر/ حيث يتطلب ان يوضع اللسان قرب اللثه العليا مع اهتزاز طرف اللسان و يتعذر الطفل في نطقها و يتم ابدالها ب (/ي/ل//غ/)او تحذف نهائيا من الكلمه
اللدغات الخلفيه الى الاماميه: اخراج الاصوات الخلفيه يصعب على الطفل نطقها فيبدلها بصوت امامي يسهل نطقه مثال : ابدال صوت (/ك/ /ت/) (/ج/ /د/) و احيانا يتم ابداله بصوت /أ/

جدول نمو و اكتمال الاصوات :
من عمر سنه و ست شهور الى ثلاث سنوات : الاصوات /م/ /هـ//ن/ /و/
من عمر سنه و ست شهور الى اربع سنوات : /ب/
من عمر سنتين الى اربع سنوات : الاصوات /ك/ ج/ /د/
من عمر سنتين الى ست سنوات : /ت/
من عمر سنتين و ست شهور الى اربع سنوات /ف/ /ي/
من عمر ثلاث سنوات الى ست سنوات : /ر/ /ل/
من عمر ثلاث سنوات الى ثماني سنوات /س/
من عمر ثلاث و ست شهور الى سبع سنوات /ش/
من عمر اربع سنوات الى سبع سنوات /ز/
من عمر اربع سنوات الى ثماني سنوات /ق/
من عمر اربع و ست شهور الى ثماني سنوات /ث/
#ابراهيم_عدلي_اخصائي_امراض_التخاطب
**دلوقتي اتكلمنا نظري كتير تعالوا ندخل في جزء عملي صغير
اعمل ايه بعد ما عرفت كل الكلام اللي انا ولي امر مليش دعوه و عايز ابني يخف اعمل ايه ؟؟؟
– اوعي لو الطفل بينطق صوت بشكل خطأ تدلعي فيه بنفس نطقه الغلط عشان منثبتش النطق الغلط
– لو فيه شخص عنده لدغه محيط بالطفل يحاول بقدر الامكان عدم نطق الصوت اللي عنده لدغه فيه عشان الطفل ما يكتسبهوش كصوت اصلي
– لو سمعت الطفل مش بيقول صوت /ل/ او /ر/ يا ريت نروح دكتور انف و اذن عشان نطمن على سلامة عضلة اللسان و عدم وجود رابط لسان
– قد يكون فيه مشكله في السمع كفقد جزء من السمع هو اللي ادى الى مشكله من مشاكل اضطرابات النطق بتتطلب زيارة دكتور انف و اذن و دكتور سمعيات

طيب عملت كل ده و بعدين ؟!! قول المفيد بقى !!

***العلاج:
#اخصائي_عيالي_ابراهيم_عدلي
***لو طفلك من عمر 2الى 6 سنوات كل اللي عليك تعمله :
– نشتغل تغذيه سمعيه مصححه للكلام يعني نصحح كل كلمه بيقولها غلط
– بلاش نضغط عليه و نقوله قول كذا
– بلاش نقول كده انت بتقول غلط او اتكلم عدل او كلمات من هذا القبيل
– لما يقول كلمه خطأ “فاحه” نحفز الطفل و نقوله “تفاحه” مالها التفاحه ؟ او عايز تفاحه ؟ و نكمل سياق الكلام عادي
– نضغط على مخارج الاصوات بقوه (منعليش صوتنا ) لا!! نقول بقوه
– نقسم الكلمه لمقاطع (اش- رب) ( طا – ما- طم) (عا- را- بيه ) (شو – كو – لا – ته )
– الادراك الحسي للصوت نحسس الطفل الصوت نحط ايده امام فمنا و احساسه باهتزاز الثنايا الصوتيه
*** لو طفلك من عمر 6 فيما فوق :

– يحتاج الى تقييم من مختص لاعضاء النطق ( قد يكون هناك تشوه في الاسنان و عدم انتظامها او تشوه في اعضاء النطق بوجه عام
– يحتاج الى تقييم اصوات من خلال اخصائي تخاطب

***مثال لخطه علاجيه للدغه السينيه : (اي صوت فيه مشكله نمشي على نفس الخطه )
-تسجيل صوت الطفل او الشخص و اعاده سماعه للمقارنه بينه و بين الصوت الصحيح الذي يقوم به الاخصائي
-التدريب على صوت/س/ منفرد (سسسسسسس)
-التدريب على صوت /س/ في مقاطع :
*(سا – سي – سو)
*(سا سا – سي سي – سو سو )
*(سا سي -سا سو)
*(سي سا – سي سو)
*(سو سا – سو سي )
– التدريب على نطق الصوت في او الكلمه : (سد – سلم – سكر – سمك – سرير – سياره – سفينه)
– التدريب على نطق الصوت وسط الكلمه : ( اسنان – اسد – لسان – مسجد – مسلم – اسود – كوسه – اسبوع – عسل)
– التدريب على نطق الصوت اخر الكلمه : (خس – تنس – حرس – جرس – شمس – بطاطس – مهندس- رأس )
– التدريب على نطق الصوت مكرر في كلمه : (مسدس – سمسم – سلسله – رمسيس – سويس – سوسته)
-التدريب على نطق الصوت في جمله : ( الكرسي مكسور – مسحوق الغسيل – الاسد سريع )
-التدريب على نطق الصوت في قصه قصيره ثم حوار مسترسل