الغيرة بين الاخوات

الغيرة بين الاخوات

كتبت علا خضير

تعتبر الغيرة من المشاعر الطبيعية عند الطفل اللي المفروض نتقبلها؛ لانها حقيقية وواقعيه بس لازم ناخد بالنا ان الغيره ليها حد يعني متزدش عنه …. يعني ايه الكلام ده؟

الغيرة عند طفلك بتبقي عباره عن ألم حاسس بيه، بس مش عارف يعبر عنه او يقولك هو حاسس بايه، والمشكله بقي إننا غصب عننا ممكن نزود مشاعر الغيرة دي بتصرفتنا في مواقف بتقابلنا مع أولادنا.

أساليب الغيرة اللي بيستعملها طفلك عشان يعبر عن غضبه كتيرة ومختلفه لانها بتكون عبارة عن سلوك بيصنعه طفلك عشان يطلع فيه مشاعره، زي مثلا انه أول لما بيتولد طفلك الجديد، ممكن في الاول يظهر الحب وأول ما تجيله فرصه الانتقام تلاقي بقي قرص، خبط، جر.

وممكن كمان الغيرة متكنش في شكل عدوان بمعني انك تلاقي طفلك رجع لمرحله عمرية متأخرة؛ يعمل نفس اللي بيعمله الطفل المولود.
ومن الوسائل اللى الطفل بيعبر بيها عن مشاعر الغيرة:
– الصريخ والزن اللي مش بيخلص .
– سلوك عدواني (ضرب – عض – قرص) .
– التمرد والعناد .
– عدم سمعان الكلام .
– انطواء( يقعد لوحده) .
– وفي كمان سلوكيات ممكن طفلك يعملها مع الطفل الجديد زي انه يحط ايده في بوقه او انه يرجع تاني يتبول علي نفسه لاراديا او انه يشرب من حاجه البيبي الجديد .

طيب الغيره دي ليها اسباب؟
– ايوه طبعا ليها اسباب…

١- ان الطفل حاسس انه عنده نقص في احتياجاته مش لازم اكل وشرب في اهم منهم .. حب وحنان واهتمام .

٢- التمييز بين الاخوات (محمد ده مريحني وبيعمل كل حاجه لكن احمد ااااااه منه مغلبني ومطلع عيني) .

٣- العقاب (وهما بيلعبوا مع بعض فجأه اتقلب اللعب خناق فطبعا ماما أو بابا هينحازوا لحد وهيجوا عن الحد التاني و ده من غير قصد اكيد بيكون بيحصل بشكل طبيعي ان ديما احمد غلبان ومحمد ده الشقي هو اللي بيضيق اخوه) لو هتعاقبوا تعاقبو الاتنين او تخليهم يتفقوا ع اسلوب للعقاب .. يعني من الاخر متجوش علي اخ وتسيبوا التاني .

٤- تحميل طفلك الاكبر مسئوليات هو مش قدهايعني مش سنه .

٥- عدم احساس طفلك بالامان .

٦- الغيرة من المولود الجديد .

نتعامل ازاي مع مشاعر الغيرة دي؟

١- أول حاجه لازم نكون متفقين عليها مفيش عقاب علي مشاعر الغيرة؛ لانها غصب عنه هو حاسس ان أهم حاجه اتخدت منه وان اهتمامك بيه قل .

٢- بلاش مقارنه بين الاخوات لان المقارنه هتخليهم يغيروا وممكن تؤدي للكره .

٣- افهم مشاعر طفلك واحتويه .

٤- التشجيع وده عنصر مهم جدا .

٥- زرع ثقة طفلك في نفسه .

٦- اشركه في انشطه اجتماعبة .

٧- المساااااواه في المعامله بين الولد والبنت عشان التفرقه دي هتولد شعور الغيرة وده هيؤدينا لطريق تاني احنا ف غني عنه لما يكبروا.