لينا رب

لينا رب

بقلم صفيه نصار

يادنيا كفايه ظلم فينا
إنتي إيه معندكيش يامه ارحمينا
الفقير ملوش تمن ودايما خارج نطاق الخدمة
نفسي لومره تحسي بينا

موريانا الويل وجايا علينا وحاطه
والله خلاص مش حمل خبطة
الضرب في الميت حرام
بس مين يسمع وإحنا بنأدن في مالطا

يادنيا عيب عليكي اختشي
طالعه نازله عماله تلطشي
خفي إيدك بقى شبعنا منك مرمطه
نعمل اي لاورانا ولاقدامنا وتعالي فتشي

خلاص العمر ضاع وقربنا نسيبك
وإنتي فاتحه كل الطرق لمحاسيبك
وقافله علينا اتخنقنا وشقانا كله بنحطه في جيبك

هو إنتي اي قلبك حجر ولاملكيش قلب
قاسيه علينا ومعيشانا في خوف ورعب
إحنا مش قدك يادنيا ولاهناخد حق منك ولاهنقول غير لينا رب