مشيرة موسى تكتب ” تشرب قهوة “
من صغرى بحب ريحة القهوة … ابويا كان بيحب يشرب فنجان القهوة فى مواعيد محددة … بعد الفطار وقبل ما ينزل الشغل … يشرب فنجان قهوة … بن غامق محوج على الريحة … اما الفنجان التانى فكان قبل ما ينزل مكتبه بعد الظهر … هو كان كفاية يشاور وكأنه كاتب حرف ” C ” … يعنى مقاس فنجان القهوة الصغير … دادة خضرا ام عيون خضرا كانت جرى تعمل احلى فنجان قهوة … اعتقد انى ادمنت القهوة وريحتها من حب ابويا للقهوة … بس انا بشرب القهوة سادة … لما كنا نخرج لمكان ونطلب قهوة كان الجرسون يدينى الفنجان اللى على الريحة ويحط السادة قدام ابويا … اللى بيشرب قهوة سادة هيفهم قلة المزاج والعكننة اللى كانت بتحصل ساعتها …
القهوة دى مشروب الناس اللى بتفهم … واللى بتعرف تتذوق … جدتى الله يرحمها كانت بتحمص البن وبعدين تطحنه بالمطحنة اليدوية… وطبعا ريحة البيت بتبقى تحفة بجد … وبعدين ييجى دور صينية القهوة والسبرتاية … وفنجان القهوة يتعمل بالمية الباردة على نار السبرتاية الهادية … وبالهنا والشفا … كنت نسيت شكل صينية القهوة النحاس لحد وانا فى الجامعة لما شربت واحد من احلى فناجين القهوة من ايد طنط بطة والدة معتزة اعز الصديقات … شخصية رائعة لا مثيل لها …
طبعا البن ده طلع له مليون استخدام آمن … مثلا كانوا بيلحسوا العيال تنوة القهوة علشان تنطق بسرعة … وممكن اضافة تنوة القهوة للزرع … خصوصا الفل … علشان يرعرع … وممكن نعمل من تنوة القهوة احلى ماسك للوجه واليدين … كل ده طبعا باتكلم عن البن اللى بيسموه تركى فى البلاد العربية بس … غير كده ممكن تدخل فى خناقة فى بعض البلاد الاوروبية لو قلت بن تركى …
بعد ما ظهر البن سريع الزوبان … و٢ × ١ … و ٣× ١ … الدنيا اتغيرت … محلات فتحت للنوع ده من القهاوي … وكتر الكلام عن العجائب … ده بن مميز علشان بيضيفوا له … نمشيها افرازات … قوارض أو حيوانات معينة … وكلام كتيييييير وغريب … فى إيطاليا وانتم ماشيين فى الشارع مش هتقدروا تقاوموا ريحة البن … افتكرت حكاية … مرة وانا فى أمريكا حد قال ” انت بتشربي قهوة كتيييييير ” وانا رديت بعفوية شديدة
” هو ده سبب سمار لونى ” … المهم ان الامريكان صدقوا … تتصوروا … ما علينا … انا عندى فى البيت صينية القهوة والسبرتاية اللى ماتطلعش الا للغاليين … اصل السبرتو الأحمر مش سهل تلاقوه زى زمان …
ليه بأااااه موضوع القهوة ده … الاحصائيات بتقول ان المصريين شربوا بسلة ونوى بلح متحمص بدل القهوة فى الفترة اللى فاتت … المصريين دفعوا فلوس كتيييييير جدااااااااا فى بن مغشوش … رغم ان الكيلو عدى ال ٨٠٠ جنيه … طيب فين شهبندر التجار علشان نشتكى قلة المزاج دى … ارجوكم الا القهوة … حراااااام.
