مشيرة موسى تكتب … ” التجربة والخطأ “

من اربع خمس سنين …زى اليومين دول … كنت قاعدة مع صديقتى الفنانة همت صلاح فى مكان لطيف فى المعادى … الشمس حلوة والجنينة ترد الروح … والأكل مش هاحكى عليه … قصدى اقول مش وقته الكلام ده دلوقتى … ندخل فى الموضوع بأااااه … كان موجود عيال خواجات بتلعب … أصغر الأطفال قلع جزمته ومشي حافي في الجنينة … الأم الخواجاية ولا نطقت … هى كانت مراقباه طبعا لكن من بعيد … بعد شوية الولد قرب من صبارة كبيرة مليانة شوك … طبعا احنا وكأى ” ام مصرية ” اتخضينا وخوفنا عليه … وبدأنا ننبه الأم من خطورة الموقف وان الطفل ممكن يتعور … الحقيقة احنا اللى أخذنا درس فى تربية الاولاد … احنا شكلنا كده صعبنا على الست اللى اعتبرتنا وعاملتنا زي اي ” قروى ساذج بهرته أضواء المدينة ” … الأم المتعلمة قالت لنا سيبوه يتعلم … سيبوه يعيش التجربة … يا نهار جبروت … علام ايه وتجربة ايه لواد لسه مكملش ٣ سنين … مفيش دقيقتين والعياط اشتغل … وطبعا الولد جرى لحضن امه … الست اخذته فى حضنها وقعدت تشرح وتحكي … خلاص فهمنا بأااااه ان الدرس كده اتاخذ بالطريقة الصعبة … الطريقة اللى مابتخيبش ابدا … الست بصت لنا وكأنها بتقول لنا ” انتهى الدرس يا جماعة ” فهمتوا ولا محتاجين نقول كمان ايه اللى خلانى افتكر الحكاية دى دلوقتى … ببساطة لأنى شوفت كم هائل من الفيديوهات عن أفضل طرق تنشئة الصغار … بعض الأفلام من الصين … بتعرض ازاى لازم تسيبوا فرصة للطفل انه يفكر … إنه يتصرف … انه يبتكر … يعنى زى نظرية ” التجربة والخطأ ” الشهيرة … اللى كلنا عارفينها طبعا … لكن مش بنستعملها … طلع ان الاهل لازم يسيبوا طفلهم يخطئ ويصحح الخطأ … طلع ان العيال لازم تغسل طبقها وتنظف مكانها … طلع ان العيال لازم تتعلم تستخدم السكينة والمقص … طلع ان لازم يتعلموا يخيطوا الزرار … طلع ان احنا بنظلم عيالنا لما بنستسهل ونعمل لهم كل حاجة من اول اختيار الملابس لحد مساعدتهم فى حل الواجبات … احنا كده مش بندلع عيالنا … لأ ولأ خالص … احنا كأننا بنحطهم فى القالب اللى بنختاره … احنا بنحرمهم من استخدام عقولهم … احنا بنقولبهم على طريقتنا … علشان كده لما صاحب القالب بيختفى العيال ” بتحتاس ” ومش بتعرف تتصرف … طلع ان الأهل فى احيان كثييييرة هى المسؤولة عن صناعة انسان غير مسؤول لا يصلح ان يعيش خارج القالب … طلع ان الطريقة دى ممكن تكون سبب ارتفاع حالات الطلاق فى مصر … ايها الاهل الكرام … علموا وعززوا قدرة الصغار على التفكير … عايزين عيال بتعرف تفكر … عايزين عيال بتعرف تفرق بين الصح والغلط …