كفاية انَّك
شعر …….ابتسام عبد الصبور
تقول ثانية و راجع لِك..
تعدي سنين
نسيت الحب كام نَسْوَة ؟
و خليت الألم كِسْوَة
و فات كام دهر في بعادَك ؟
وقالوا يومين
و اهو عدَّى عليا الفَرْح
ما اهتميت
و حتى الحلم صوته انبح
مارديت
و حرَّمت الحياة لما
تعود لي مبتسم سِنك
كفاية انك
شنقت الورد كام مره
وقلت : سماح
و مدِّيت طرحتك بره
و انا المحروم
و لا بترد فيا الروح و لا بارتاح
و كام مرة يجور عَدلك
على المظلوم
عَزَفت الناي على صرخه
ما وصلتشى
وقلت إزاي بقت واحدة
دموع الحزن والفرحة
ماتفرقشي ؟
ده خط الصبر عديته مع الوحدة
و توب الحب شقيته
بسوء ظنك ؟
كفاية انك
قسمت الحلم كام قسمة
و جاي تختار
صبغت القلب من دمي
و بان حِنَة
خلعت الضي م النني
..و داب حبل الرضا بينا
و بدلته خيوط من نار
و نام الهجر ويانا
و لحظة خوف ملازمانا
و صرت الخصم والقاضي
.. ياقاضي قول لي
عدلك ليه بعد عنك ؟
كفاية انك
قطعت التذكرة فردي
و مش راجع
و حطيت الأمل والفرح
في الشنطة
و خليت لى غناوي
يأس و مواجع
و ما خليت من الضحكة
ولا حتة
نسيت عندي ليالي
م الجفا شابت
نهاية قصة مكتوبة
على ضلك بلون باهت
و حلم قديم ومتشوه
و روح شاخت
و حمل تقيل على قلبى
فضل منك
كفاية إنك
