امبارح وانا قاعدة ” اعد غنماتى” … زى جحا ما كان بيعمل … فوجئت ان احنا لسه فى اول الشهر وان ما بقاش فيه غنمات … طيب ايه … حاولت اعصر مخى فلوس المعاش الكتييييرة اللى بقبضها كل اول شهر راحت فين … ولا اعرف … طيب فكرى … اعصرى مخك يا زينب … اعصرى مخك يا زينب … ولا فيه فايدة … جبت ورقة وقلم ومراية وقعدت افكر واستفسر واسألنى … يمكن اشتريتى لبس العيد ابو عشرتاشر الف جنيه … لأ خالص … ده ولا حتى فيونكة العيد … طيب اشتريتى حاجة ذهب … لا خالص برضه … ده انا اصلا مابحبش الذهب … طيب كحك العيد … برضه لأ ده حتى الكحك جالى هدية ووزعته علشان ما اتخنش واضطر اجيب هدوم جديدة … امال ايه … فى الآخر استسلمت … طيب الفلوس وطارت … انا هاعمل ايه بأااااه … السنين علمتنى استسلم من بدرى وان اللى حصل حصل … وزى ما علمونا فى الأمثال انه ” لا فائدة من البكاء على اللبن المسكوب ” يعنى ” الفلوس اللى طارت طارت خلاص ” … وبناء عليه … وحيث انى مش هاقدر انزل المع ازاز العربيات أو حتى ابيع ورد فى الإشارات علشان افضل اقول ” ورد للورد ” أو ” ربنا يخليلك الأمورة ” فأنا قررت اغريكم تعملولى جمعية وتقبضونى الاول … ويا تلحقونى يا متلحقونيش لان كده مفيش فايدة فعلا … وانا من موقعى هذا ” موقع الضعيف ” اقر واعترف ان طول حياتى دخلت “جمعية ” مرتين … مرة علشان حد من المعارف كان عايز يغير حمام بيتهم وقيمة الجمعية راحت كاملة لهذا الهدف النبيل … ومرة تانية كان علشان يبقى معايا فلوس كتيييييير لكن للآسف اخذت مقلب عمرى من الست ” صاحبتى” المسئولة عن تجميع الفلوس … هى الأول غيرت ميعادى للأخيرة فى الجمعية من غير ماتبلغنى … وبعدين فى الآخر بلغتني وهى بتعيط ان مرات ابن عم مرات ابوها اتوفت وان مفيش فلوس لانهاء اجراءات الدفن … وان يا بخت فاعل الخير … وبس خلاص دى كانت نهاية علاقتى بالجمعيات … طيب ممكن دلوقتى تسألوني باهتمام اذا كان لدى مطالب أخرى … الحقيقة لأ … متشكرين جدااااااااا … لكن المهم الجدية وسرعة الإنجاز وجمع المشتركين … ويا ريت يكون جميع أعضاء الجمعية من منطقة سكنية واحدة علشان سرعة الإنجاز … انا كده مش بتعامل زى ” بكيزة هانم ” ولا حاجة … لكن من فضلكم… طلب اخير لضمان الجدية … على أعضاء الجمعية الجدد الالتزام بمواعيد تسليم الجمعية بدون تأخير … مين قال معاكم ؟؟؟ ردوا بسرعة الله يبارك لكم … الاعداد محدودة …
