مالك يا عم نجيب

أيمن بحر 
قول يا عم نجيب ما هو الكلام ببلاش
أربع تربع سندات ودهب وعقار وكاش
تصدق يا باشا غير طوارئ ما معناش
التلاتة الباقيين إحنا عليهم ما نوعاش
…
منين يوفر الربع اللي يشتري بيه سَند
وما فيش معاه غير ضهره وعليه سَند
ضاقت عليه ظروفه وحظه معاه عَند
لو فطر طقه لا بيتغدى ولا بيتعشاش
…
وعاوزه يشتري بربع فلوسه عقارات
طب كيف وهو أصلا ساكن إيجارات
وأخر الشهر قهر وضهر بدون فقرات
وديون وهموم وحمول تعبي أوناش
…
قمبر ساكت إحمد ربك على ما وهب
سيب الغلبان لا عمره سرق ولا نهب
مطوق بالحديد ومنين يجيب الدهب
وكويس إنه راضي ووسطيكم عاش
…
قسِمها براحتك ووزع فلوسك أرباع
المطحون ماله باللي اشترى ولا باع
معجون وكإنه فريسة وسط السباع
نفسه في الراحة ولكنه ما طايلهاش
…
الخمسة تلاف وعاوزه كيف يقسّمها
جرام دهب ولا فيلا كرتون يجسّمها
ملياراتك وبراحتك أحلامك ترسمها
الشباب أحلامه غير ستر ما اتمناش
…
مَيت شغالين كل شويه في كهريبه
مالكم وماله ما تسيبوه في رباريبه
خليكم في مالكم تجميعه وتهريبه
وفر نصحك للي نهبها وما رحمهاش
…
فينا وفين دهبك وكاشك وأنتيكاتك
الشباب طالبين دعمك مش تويتاتك
فك فلوسك جهز مصانعك وشركاتك
يا عم نجيب جيب جيوبنا مافيهاش
…
فكك من شغل التربيع ومن التوزيع
دابت صدورنا من الترقيع والتمزيع
وشخلل جيوبك بدال شغل الترزيع
اللي ينسى خير أمه ما يستاهلهاش
…
مالك يا عم نجيب بتقول أعاجيب
انت واعي لكلامك ولا عنينا غريب
شباب ما اتجوزتش وقربت تشيب
ومؤهل عالي شغال غفير وفراش
…
بلغ نصايحك للي سرقوها ونهبوها
طلعوا فلوسهم برا بلدهم وهربوها
سيب الفقرا اللي عشقوها وحبوها
اللي حبها بقلبه عليها ما يتوصاش