كفتة الحاتي زي المطاعم 

رانيا فتحي عواد 

المقادير:

 ½ كيلو لحم مفروم بنسبة دهن متوسطة
 1 بصلة متوسطة
2 ملعقة كبيرة بقدونس مفروم
 1 ملعقة صغيرة ملح
1 ملعقة صغيرة فلفل أسود
1 ملعقة صغيرة بهارات لحمة
 ½ ملعقة صغيرة سبع بهارات
 ¼ ملعقة صغيرة جوزة الطيب اختياري
1 ملعقة كبيرة زيت أو لية مفرومة ناعم
 رشة صغيرة بيكنج صودا اختياري

مهم جدًا:
البصلة تتبشر ناعم جدًا وبعدها تتصفى كويس جدًا من الميه عشان الكفتة ما تفكش.

الطريقة:

1. ابشري البصلة ناعم وصفيها كويس جدًا.
2. في بولة حطي اللحم المفروم مع البصلة والبقدونس والملح والفلفل والبهارات والزيت.
3. اخلطيهم كويس جدًا بإيدك لحد ما الخليط يتماسك.
4. غطيه وادخليه التلاجة 30 دقيقة.
5. شكلي الكفتة على أسياخ أو صوابع طويلة.
6. شويها على شواية أو جريل أو طاسة جريل مع التقليب لحد ما تاخد لون حلو وتستوي.

سر طعم الحاتي:
حطي فحمة مولعة في ورقة فويل أو طبق صغير وسط الكفتة بعد التسوية، ورشي عليها نقطة زيت، وغطي الحلة أو الصينية دقيقتين بس، هتاخد ريحة الشوي بتاعة المطاعم.

لو هتتعمل في الفرن:
ترص في صينية على ورق زبدة، وتدخل فرن سخن جدًا على 220 درجة من 15 لـ 20 دقيقة، مع تشغيل الشواية آخر دقايق.

تتبيلة البصل زي المحلات:
بصل شرائح + سماق + رشة ملح + عصير ليمون + بقدونس
يتقلبوا مع بعض ويتقدموا جنب الكفتة.

تقدم مع:
عيش بلدي + طحينة + سلطة + بطاطس